O le faatupulaia o le taleni pese i fanau ma alo talavou o Samoa faapea le Pasifika, o se mitamitaga tele lea pe a maitau atu i le tulaga faagaeetia ua iai taumafaiga a alo ma fanau talavou.
O le aufaipese Acapella a le Klapa Samoana, o loo taitaia e se tasi o alo talavou o Samoa o le susuga ia Christian Malietoa-Brown. Na amata faavaeina lenei aufaipese i le tausaga e 2011, peitai ua maoae le tulaga maualuga ua ausia e lenei aufaipese.
Na amata mai lava i totonu o le aoga a St. Peter’s College, pei ona ta‘ua e le taitai, na faapotopoto mai ai nisi o tamaiti aoga, seia oo mai lava ina faapolofesa, ma ua maua le avanoa e malaga ai i atunuu i fafo i luga lava o le taleni.
O loo sauni nei le Klapa Samoana e malaga i Europa, faapea se valaaulia mai Melepone Ausetalia atoa ai ma le malaga i Samoa i se taimi o le tausaga nei. E na o le toafitu le aufaipese o le a malaga i Europa mo le faamoemoe e aofia ai le alo o Samoa e toalima, Christian Malietoa-Brown (taitai), Easton Malietoa-Brown, Austin Malietoa-Brown, Fredrick Lewis ma Geoffrey Ioane, ma nisi o talavou Tonga, o Taka Vuni ma Kulu Liava‘a.
O le faamoemoe o le tuufaatasia o lenei aufaipese, o le fia faaaogāina lea o le taleni pese a le tupulaga talavou, faamautuina o pese faaleaganuu Pasefika atoa ai ma le tuufaatasia o musika ma pese faaonaponei.
E pei ona silafia o pese acapella o ni musika ia, e leai ni mea faaili e faaaogāina peitai na o leo ma siufofoga malu o le alii pese nei e faaaogāina ma musika.
E ui o se aufaipese fou, peitai ua pisi fuafuaga faataatitia a le Klapa Samoana, auā e lē gata i malaga o loo fuafua mai, peitai o loo ua iai foi nisi o faamoemoe tetele ua faasauni e pepese ai i totonu o Niu Sila nei.
O loo iai le latou faamoemoe i le faaiuga o le vaiaso nei, o se latou sailiga seleni lea e fesoasoani i le tau atinaeina o le aufaipese, aemaise o le fesoasoani tau seleni mo malaga o le a sauni atu i ai, ma o le a faia lea i le Auckland Girls Grammar School i le Aso Faraile, 24 o Me. E faamoemoe a mae‘a mai le malaga taamilo lea i Europa, o le a mafai ona maua avanoa e toe faaopoopo ai nisi tupulaga talavou e fiafia i le musika, e fai ma sui o le Klapa Samoana, ona o le moomia tele o nei ituaiga faafiafiaga faa-Pasefika.
