Ua o se moemoe ua totogo a‘e i manatu ma lagona o le aiga fou ina ua aulia le aso sa taupoina. A o fiafiaaga foi o aiga na lua ina ua faapaiaina le fanau i luma o le Atua, ma amata le aiga o le fanau i le tala lelei. O vaaiga o le fiafia sa vaaia i le Aso Toonai ina ua amataina le sauniga o le faapaiaina o le tuufaatasia o le faatoafaiava ma le faatoanofotane i le sakalameta o le faaipoipoga.
O le ofisa fai faaipoipoga o le Susuga ia Rev Sapu Samoa o le tamā faaleagaga o le tamaitai faaipoipo ia Ruth. Sa faatumulia le aso fiafia i aiga ma uo a le ulugalii fou aemaise aulotu e lua a le EFKS a Pinerivers le susuga ia Rev Tapenaga Reupena ma le faletua faapea le paia o le Ekalesia ma le EFKS Ola Fou Decepion Bay le susuga ia Rev Sapu ma Sue Leata Samoa ma le Ekalesia.
E lē gata i lea o le paia ma le mamalu o aiga na lua i ona itu taulagi. Sa maua foi le avanoa e mafuta atu i ai le susuga i le Toeaina ia Rev Ionatana ma le faletua ia Alapeta Faaiuaso, malaga mai ai foi nisi o aiga mai Samoa Niu Sila auā lava le pelega o fanau.
O le kapeteni o le aso o le Fetalaiga ia Vaipua Tagaloa, o tuaa o le faatoanofotane o Nuuese ma Peone Pese mai Uafato, Apolima & Vailuutai.
O le tina o le faatoafaiava o Siaunofo Solitua, o mātua sa fai ma mātua o le tama faaipoipo le tofa Fiu ma Tumama Polataivao.
Sa faataunuuina lava tu ma aga masani e ala i faaaloaloga a le atunuu auā valevale alofa o mātua ma aiga auā le aufaigaluega a le Atua. Faaiuina le aso i se tatalo ma ta‘ape ai le filialii.
