Na faatumulia le Maota o le Star Palace i Fairfield i aiga ma uo na latou molimauina le Aso faapitoa o le faaipoipoga a le susuga ia Nifae Sita ma lana purinisese ia Talosaga Tautai, e pei ona faataunuu i le po o le Aso Toonai na tea nei. O le sauniga o le faapaiaga na faia lea i le Malumalu Katoliko a St Christopher’s i Holsworthy.
Na vaaia le matagofie o laei o le alii faaipoipo ma lana laina faapea le tamaitai faaipoipo ma le aumeamamae. I molimau a mātua na muai saunoa mātua o le tamaitai faaipoipo le tamā ia Tuuu Sale Tautai i lo la feagai ai ma si ona afafine mai le itiiti seia oo mai i lenei aso faapitoa. “O Talosaga o se tamaitai e toaga i le lotu ma fiafia e mafuta i lona aiga aemaise le alofagia e lana ekalesia.”
Mai le tele o ana taleni sa auai foi Talosaga i le sailiga o se lalelei o Samoa i le tausaga talu ai faapea le faalauiloaina (model) o laei ma mamanu o ofu Samoa na faatautaia e le Lavashe Couture.
Na saunoa le tina ia Faamuamua Tautai i uiga filemu ma le tausaafia o si o la alo tamaitai ma ua faamanuiaina i se alii uiga tutusa ia Nifae.
O le tina o le alii faaipoipo ia Manufui Soofa Sita na saunoa e faailoa le agaga fiafia ua feiloai si ona alo ma lana manamea o Talosaga.
Na maua i saunoaga a le tina e ui ua loa ona fai i lagi le folauga a le tamā o le aiga, peitai o loo tapuai fiafia mai i si ona atalii. “O Nifae o se tama e agaalofa tele, ma a tuua lana aoga e faigaluega e fesoasoani mai i le tusiga o si o matou aiga.”
Sa auauna foi o ia i lana Ekalesia i le faamisiona i Filipaina ma ua toe taliu mai.
O le taimi nei o loo galue faaloia Nifae i Sini ma e tele foi lona sao i mataupu tau fautua mo tupulaga ia mamao ese ma puapuaga ma soligatulafono. O loo avea foi ma sui failautusi o le Fono Aoao a tagata Samoa i Sini ma o loo taitai i le polokalame e faufautua mo Tupulaga Samoa i Sini nei.
Na mae‘a le faapaiaina o le Keke faapea le siva muamua a le ulugalii fou ona alo atu loa lea i faafiafiaga matagofie a ausiva a aiga na lua faapea faaaloaloga mo le valaaulia.
Na lē faatali le mamalu o le aofia i le fiafia matagofie a o faafoe mai le musika e le faaili. Na matagofie foi ma felanulanuai le taumafataga faapea le vaiinu ma le uaina na talimasegei ai le maau ma le milomilosia o paia ma mamalu na aofaga fiafia ai i le Faaipoipoga matagofie a Nifae ma Talosaga.
