O le Aso Toonai ua mavae, aso 2 o Iulai 2011, na tuufaatasia ai le tamaitai ia Bernadette Sanita Smith ma lana manamea le alii o Hans Purcell Percy Aiono.
O se mitamitaga fai a‘e i o laua aiga aemaise o mātua pele, ona o se sini na fauao faupo, ina ia tuufaatasia fanau e ala i a‘oa‘oga o le talalelei, e pei ona faataunuuina.
O le tamaitai ma le alii faaipoipo, e auai i laua i le la Ekalesia pele a Iesu Keriso o le Au Paia o Aso e Gata ai poo le Ekalesia Mamona, Uarota i Yates Road i Magele i Aukilani.
Peitai, o se sini lenei e moomoo uma i ai le tele o mātua aemaise i latou uma ua auai i le Ekalesia, ina ia faaipoipoina ma faamauina se mafutaga faapenei mo alo ma fanau, i le Malumalu Sa, auā sauniga e faamau ai mo le olaga nei ma le olaga a sau.
Na mae‘a le sauniga o le faapaiaga ma le faamauina o lo la aiga fou i le Malumalu Sa o le Ekalesia i Hamilton, ona taliu mai loa lea mo le fiafia tele aemaise o se taumafaga tele na saunia e le Continental Catering, e patipatia ai le aso fiafia o le fanau. Se mea ina a mataina, o fanau e savavali i le upu moni.
O le susuga ia Isaia Leofo na avea ma sui o aiga-na-lua e fai ma fofoga o le aso, ma na molimauina le maualuga o le faamoemoe mo le faato‘ā faiava ma le faato‘ā nofotane.
Na faaalia lo la fiafia tele aemaise o le talisapaia o le sagisagi atu o le auvalaaulia ma o la aiga, e molimauina lo laua faamoemoe.
O le tamaitai ia Bernadette Sanita Smith, o nai ona tuaa o le susuga ia Robert Thomas ma le faletua ia Fanuatanu Smith. O le alii faaipoipo o le alo o le susuga ia Sani Aiono ma le faletua ia Veva Aiono.
Ua momoli atu ai alofaaga ma faamanuiaga mo lo oulua aiga fou. Ia maualuga le alofa o le Tama o i le Lagi mo oulua, ma ia fua tele le niu. Alofaaga mai o oulua aiga, Ekalesia, uo ma ē masani, aemaise nai o oulua mātua.
