O le Aso Toonai 3 Setema 2010 (ananafi i Samoa) na tuu faatasia ai le afioga i le Minisita o Galuega Tetele ma Fela‘uaiga, Afioga Tuisugaletaua Sofara Aveau ma lona faletua fou, o Seutatia Solomona i le sauniga o le faaipoipoga.
O le malumalu EFKS i Fagalii-tai na faia ai le sauniga sa faatumulia i aiga e lua, le ekalesia, aemaise o le mamalu o le Malo i le alii Palemia ma lona faletua, faapea Minisita o le kapeneta ma o latou faletua.
O le susuga i le toeaina Peteru Tone na taitaia le sauniga ma ia faapaiaina le ulugalii fou. O le autū o le lauga a le susuga i le toeaina, “O se avā amio lelei, o ai ea ua na maua”.
E pei ona silafia o le amataga o le tausaga nei na tuumalo ai le faletua o le alii minisita i se gasegase sa faataotlia ai i Samoa ma Niu Sila, lea na tuumalo ai a o iai i Aotearoa mo se siiga gasegase.
O Seutatia Solomona o se faiaoga e maualuga lona tulaga i le a‘oa‘oina o le musika i totonu o le Iunivesite Aoao a Samoa. Ia faamanuia le Atua i le aiga fou ma ia fua fetiitii le niu.
