A su‘i se faasolo, e ui ina eseese sasala ma manogi lelei e pua‘ina mai, peitai o le ‘ula lava e su‘iina i ni fugalaau. Poo fea lava sa aga i ai le soalaupuleina o ni manatu i se ogaeleele sa foufou e aga atu i ai, ae a tasi le loto e maua lava le fiafia i soo se mea.
Na fesilafai i pue o manū ae lē o pue o mala le Aiga Samoa i Logan City e pei ona faataatia e aga atu i le itu i Matu mo aso malolo o le aso faamanatu o Ausetalia, peitai na toe fefulisai manatu ma maua ai le tasi ma faapea loa ona faataunuuina i le maota o le afioga i le Peresitene ia Tareta Hakula Siakisini ma le faletua ia Anne. O le mafutaga a le Aiga Samoa i Logan City, mo le silafia e nisi, ua 3 nei tausaga talu ona faavae mai, e lē o se mafutaga o se faalapotopotoga masani a se aiga poo se nuu e pei ona masani ai le tele o Faalapotopotoga, ae ua na o se tuufaatasiga o ni aiga e 25 o loo iai nei, auā le taumafaiga o le toe faafoi mai o tapuaiga e faaaogā ai le tatou lava gagana Samoa ina ia matagofie ai le auaunaga tapuai ma fesoasoani malosi foi i nai mātua matutua.
E auau lava le tava‘e i ona fulu, o le suamalie foi lea ma le ute pe a manatu i nei atunuu o soifua ma ola a‘e ai, e pei ona tutu malosi ai foi lea vaega o finauina pea le toe faafoi mai o le Gagana Samoa i tapuaiga.
O le aso 26 o le aso malolo o Ausetalia sa iai le faamoemoe mo se tafaoga i le Blue Lagoon i Redcliffe, peitai o tulaga faaletonu ma le loulouā o le tau lea na lē oo ai lea fuafuaga, ae na toe autasi uma e faia taaloga faapea le maimoaina o ata Samoa, ma se feiloaiga lava a le Aiga Samoa e fatufatu foi ma su‘isu‘i se ‘ula auā le lelei ma le agai i luma o lenei tausaga ma ona laasaga.
Sa iai nisi o aiga sa lē mafai ona auai ona o fuafuaga faaleaiga, faapea le toatele o le tupulaga talavou sa galulue i lea aso.
O le susuga ia Mataafa Tareta Hakula Siakisini ma le faletua ia Anne o loo avea ma matua faufautua poo le Peresitene o le Aiga Samoa, Afioga ia Tavai Leota ma le faletua ia Toa o loo avea ma fesoasoani, susuga ia Peniamina Fenunuti o le aao tusitusi, Site Ah See o le teutupe, Taitai o Gaioiga o le tofa ia Maiava Fia Tautu.
E mamalu ma maopoopo lenei mafutaga ona o le faufautua a nisi o tuaa sinasina o loo tu malosi mo le lagolagoina o le aiga Samoa, e pei o le tina matua ia Manuu Iliafi Vaele ma lona auaiga atoa, Faimafili Sinuu Lealiiee, le afioga ia Tavai Leota, susuga ia Mataafa Hakula Siakisini, susuga ia Willie Laurenson, faapea le susuga ia Len Lomiga Wilson.
E tulimatai le mafutaga i taimi e feiloai ai auā a mafuta toetoe a lē toe taape pe a oo ina mafana talanoaga faaleuo ma le faaleuso.
