Tuufaatasia i le Sakalameta o le Faaipoipoga Tony & Stacey Fu‘e

E lalelei i latou e laei i le alofa ua moni, ae atili lalelei pe a faatino le moni o le alofa faale talalelei e ala i le sakalameta paia o le faaipoipoga, ona o alo ma fanau e toalua ua filifili e avea i laua ma sootaga o aiga e lua.

O se vaaiga matagofie ma le lalelei lea i le Aso Toonai na mavae atu, aso 25 o Aukuso i le malumalu o le Ekalesia a Iesu Keriso o le aupaia o aso e gata ai i le pitonuu o Epping i Melepone, ina ua faatasitasi aiga na lua e tuuina atu i aao alofa o le Atua silisiliese lo latou atalii ma le alo tamaitai mai le la itu o le aiga ina ia tuufaatasia i laua.

Na faatumulia le malumalu i uo, aumea mamae ma ē pele i o latou loto Tony ma Stacey aemaise o Samoa, ona o le fia molimauina ma patipatia o le lalelei o le tamaitai o Stacey a o ia savalia le ala i le pulelaa e osi ai le la feagaiga ma lē ua pele tasi i lona agaga, le tama Samoa moni o Tony Keresoma. Na taitaia le sauniga ma faapaiaina e Bishop Stewart, o le feagaiga na osia i luma o le paia ma le mamalu na potopoto.

O le tamaitai faaipoipo o Stacey Renayee o le alo o Mary mai Niue ma David Witeri o le Maori, ae na soifua ma ola a‘e i Niu Sila, ae o le tama faaipoipo le alii o Tony o le alo o Autufuga Seiuli Peni ma Oloalupe Fu‘e.

Na sosoo le sauniga ma le taumafataga i le nofoaga o faamoemoe tetele faapenei, le Brookwood Reception i le pitonuu o Thomastown, lea na faatautaia e le tuaa o le tama faaipoipo Autufuga Seiuli Peni, na fai ma fofoga o le aso auā le valaaulia ma Samoa na potopoto, matagofie naua ma lalelei le aso tele ona o faafiafiaga ma pesepesega faa-Samoa a o alo i le taliina o le sua ma taumamafa le valaaulia.

O le viiga ma le faaneetaga e sii pea ma faafoi i le Tapaau i le lagi, ina ua ta‘ape fiafia Samoa ma le valaaulia ma le mama ua lomi ma le vaa ua goto ona o faaaloaloga a aiga na lua. Manuia tele le ulugalii fou Tony ma Stacey.