O le Aso Lulu 30 o Ianuari na faatasia ai le itumalo a Ueligitone ma faatumulia ai le maota o le Ekalesia EFKS i Cannons Creek i Porirua i le faauuga o alii ma tamaitai Pasefika e 84, na maua sikolasipi mai le malo, e aooga fua ai i Politekinika a WelTec i Lower Hutt ma Whitireia New Zealand i Porirua.
O le aofai o ē na maua tusipasi i le 2012 i le faakamuta e 38, o le landscape construction e 6, o le faainisinia e 2, o le vali ma le teuteuina o maota e 7, o le faapalama e 15, o le faipiliki ma faapipii e 3, o le fai eletise 6 ma le tusipasi mo Civil construction e 2. E 84 i latou na faamanuiaina i nei sikolasipi.
O lenei faauuga na tapenaina lava e le mafutaga a Faifeau Pasefika i Ueligitone, ma sa valaauina ai ta‘ita‘i o aoga na a‘oa‘oina ai mataupu, faapea ma ta‘ita‘i o ekalesia, ma ta‘ita‘i o atumotu taitasi o le Pasefika i Ueligitone lava.
O le tala fiafia ua toe ofoina mai foi ni sikolasipi e 38 mai Whitireia New Zealand mo le 2013. E faapena foi ona ofoina mai e WelTec i Lower Hutt ni isi sikolasipi mo le tausaga nei.
O le mafuaaga lava o le ofoina mai e le malo nei avanoa faasikolasipi ina ia fesoasoani mo le tau faaleleia o le aai i Kalaiesetete talu le mafatiaga na feagai ai ma mafuie.
Peitai ua avea nei ma fesoasoani malosi mo si o tatou atunuu ina ua afatia ma lavea i lologa ma tafega i le afa o Eveni, lea na auina ai le toalima alii Samoa na a‘oa‘oina faasikolasipi e fesoasoani i le itu tau palama.
E faafetaia le malo ona o lenei avanoa maua fua e a‘oa‘oina ai tagata Pasefika i nei matata eseese, ma maua ai foi ni galuega mo le tausiga o fanau ma aiga.
O se sauniga na tapena lelei i ai le vaiaai o atumotu taitasi i faafiafiaga matagofie. O le faafiafiaga i pesega faalelotu na saunia e le Atu Kuki Airani, o siva faafatele faatokelau na saunia e le ekalesia a Pahina Tokelau, o le taualuga faatoga na faafiafia ai se alo tamaitai o T+onga.
O le vaega ua faaigoaina o le “Fatu na totō” sa faafiafia mo le itu Samoa, faapea ma pesega malie na usuina e alo o Samoa mai le ekalesia EFKS i Cannons Creek lea o loo galulue faifeau ai le susuga ia Aufaga ma Sina Faafia; o Solomona Esera, Tautavā Esera, Falesāfune Esera ma Sina Esera. Manaia le taleni o loo ua maua foi e nei alo o le atunuu.
E momoli foi le faamalo i le Mafutaga a faifeau Pasefika mai ekalesia eseese ma atumotu eseese o le Pasefika ona ua maua se mafutaga tuufaatasi e uunai malosi o tatou tagata mo nei faamanuiaga lē lau maua.
Na saunoa le susuga ia Rev. Perema Leasi e fai ma sui o le Mafutaga a Faifeau Pasefika e faafetaia ta‘ita‘i o nei aoga ma le agalelei i le faalauteleina o le tomai o tagata Pasefika i matata eseese, faapea ma le Ofisa o Tagata o Atumotu. Na faapea foi ona faafetaia ma faamalo i alii ma tamaitai faauu aemaise o le lagolago a tagata Pasefika i lenei polokalame.