Tuufaatasia Afioga Falenaoti Agnes Regina Lene & Tua Fuimaono

Sa faatumulia le mamalu o Sagato Atonio i Magele Ogatotonu i le aso fiafia o le afioga ia Falenaoti Agnes Regina Lene, e pei ona tuufaatasia ai i le Sakalameta o le faaipoipoga ma lona alii o Tua Fuimaono.
I le aso 11 o Ianuari 2014, lea na la filifiliga mo lo la aso fiafia, ma o le Taulaga Paia o le Misasa sa taitaia e le Afioga ia Patele Talipope Tuala Vaifale Patolo, ae lagolagosua i ai le Afioga ia Patele Felise.

 
O le afioga ia Falenaoti Agnes Regina Lene e mai i le afioaga o Leauvaa ma Saleimoa. O le paia lava lea i le Aiga Faalagilagi ia Tuala ma Salā ma le mamalu i lo laua toalua ia Tevaga ma Vaifale. O le paia o le aiga sa Malietoā le afio o le toe tau fanua, o le fetalaiga ia Luatua ma le Gauta‘ala ma upu i le Faletolu.

 
Na soifua mai lenei tamaitai i Aukilani Niu Sila, o ona mātua o le afioga ia Lauano Vui ma Susitina Lene. Sa aoaoina lava o ia i Niu Sila, ma toe taliu ai i Samoa i le 1993, ma faaauau ai ana aoaoga i le tulagalua a Sagata Maria i Savalalo ma le Kolisi a Sagata Maria i Vaimoso.
O le tausaga 1995 ina ua tapena le afioaga e faamanatu le 150 tausaga o le taunuu mai o le Eklalesia Samoa, na tofia ai le afioga ia Tuala Talipope III Vaifale Patolo e faaee atu le suafa Falenaoti i fanau a ana fanau.

 
O le masina o Setema i le 1995 na faasuafaina ai loa i latou e toatolu o Falenaoti Rosana Tuala, Falenaoti Aigafaalagilagi ma Falenaoti Agnes Regina i le 9 ai o ona tausaga. Ua atoa ai nei le 17 tausaga talu ona faaee i ai le suafa o le Afioga Falenaoti o le taupou a Tuala ma Salā a o le augafaapae a Tevaga ma Vaifale.

 
O le alii faaipoipo o Tua, o le alo o Fuimaono mai le afioaga o Salani Falealii o le paia lava lea o le afio o Aiga Sā Fenunuiivao ma le Gafatasi, susū le matua Alii ma le mamalu i Atuā ma Aanā. O ona mātua o le afioga ia Tiatia Maiava Fuimaono ma le Faletua ia Lautele Ana.
Sa galue le Afioga Falenaoti Agnes Regina i lana tautua i le Ekalesia i Magele Ogatotonu o se faipese ma le tapiano mo le 11 tausaga, e faapea foi Tua Fuimaono i lana Ekalesia poo le Sinoti i Ausetalia i le Ekalesia Metotisi i Pelepitone, sa galue ai o se faipese ma le tapiano. E faafetai ai i le Atua mo nei taleni ua foai mo i laua e faaauau ai le la tautua i le Atua.

 
Na mae‘a le taulaga Paia o le Misasa sa taitaia e le Afioga ia Patele Talipope Tuala o le uncle lava lea o le tamaitai faaipoipo, ona agai atu ai loa i le Manhattan mo le aiga tele na faatasia ai ma a la Uo ma Aiga.

 
Na matuā iloga le maualuga o faaaloaloga na maau i ai le paia o Aiga e 2 i Leauvaa ma Saleimoa auā le Ekalesia i Magele Ogatotonu ma le paia o le auvalaaulia. Momoli ai le faafetai ma le faamalo a le ulugalii fou i o la mātua aemaise aiga uma sa lagolagosua malosi i le faataunuuina ma le manuia o lo la aso fiafia, ae foi ai le viiga sili i le Atua.
. . Afioga Falenaoti Agnes Regina Lene ma lana manamea le alii o Tua Fuimaono. photo: Victoria Tuala Tiatia & Skopa Tiatia . Le ulugalii faaipoipo ma la uosili ma aumea mamae  photo: Victoria Tuala Tiatia & Skopa Tiatia