O le taimi muamua lenei ua malilie ai le Fono a Tagata Samoa ma le La‘u Samoa e tuufaatasia le faamanatuina o le sisigafu‘a. Ma o le po la o le Aso Faraile na tea nei na faatumulia ai le maota o le Laluna Lounge i le Siva Faamanatu o le Tutoatasi a Sini i Ausetalia.
Na valaaulia faapitoa ai foi afioga i Faipule o itumalo e pei o Liverpool ia Paul Lynch o se sui o le vaega faaupufai a le Labour ma e umia foi le tofi o le sui Loia Sili (Attorney General) o ia foi o se sui minisita lagolago o le Faamasinoga.
Na faapea foi ona auai atu i ai sui faipule mai Samoa, afioga ia Tusa Misi Tupuola le sui faipule mai Falealili na auai mai i se fonotaga o le suiga o le tau ma le siitia o le tai (sea level rising).
O le afioga ia Toeolesulusulu Cedric Schuster le faipule o Aana Alofi # 3 (Minisita Faaolioli o le Siosiomaga), na malaga faatasi mai mo lenei fonotaga tāua na auai ai sui o le Pasefika.
Na saunoa faafeiloai afioga i alii Peresetene o le Fono Aoao, Tavaga Teleiai Malagamalii Sonny Wilson faapea le Peresetene o le La‘u Samoa, Alaalatoa Emani Alaalatoa, i le faafeiloaia ma le faamalo i le taupati atu o le atunuu i lea po. O le susuga i le faafeagaiga mai le Fono Aoao a Tagata Samoa i Sini Rev Iakopo Leleimalefaga ma le faletua ia Faiesea na auai foi i lea po faatasi ai ma le susuga ia Rev Faauuga Siitia ma le faletua ia Faatuai Siitia. Sa saunia foi e Rev Aleni Filipaina le tatalo amata i le taimi na alala uma ai le valaaulia.
O le afioga i le Konesula, Tofa Manogiamanu Fonoti Ioane na saunoa i le lauga autū. O nisi o le molimau a le afioga i le Konesula e aofia ai le luitauina o le tausinio a alo ma fanau faapea le paia ma le mamalu o le atunuu i Sini nei.
O se tausaga foi na faamanatuina mai ai i Ausetalia le aso fanau o le HRPP. Na saunoa foi le Konesula i laasaga tetele ua ausia e Samoa talu mai le tutoatasi i tulaga tau aoaoga o tamafanau i atunuu mamamo ma fesootaiga faalevaomalo auā se lumanai manuia.
Na faatūina ai foi ma le ofisa o le Konesula i Liverpool i Sini aemaise le faavae ai o nisi o faalapotopotoga e faatautaia e tamafanau a Samoa e pei o le Toomaga mo ē Puapuagatia (SVSG).
I totonu lava o laufanua o Sini nei ua faatūina ai se Leitio luasefulufa itula a le Manamea. I taaloga na faavaeina foi se Tauvaga Lakapi tafafa a le Pasefika (Inaugural Sydney Pacific Four Nations) auā le mataituina o taleni e tele o loo le mafai ona tagai i ai ‘au tetele e pei o le Waratahs ma o i latou nei e ono moomia e Samoa, Fiti ma Toga.
O le masina o Mati na afea ai foi Sini, Canberra ma Kuiniselani e le Samoa-A na aofia ai nisi o suafa iloga i le lalolai e pei o Muliagatele Brian Lima, Uale Ma‘i ma Stephen Betham ma valaaulia ai e se aoga e fai ma lauga autū o se aso faapitoa i taleni ma le lumanai manuia.
E lē gata i lea na vaaia foi le faaopoopo o sui faipisinisi a Samoa i lenei tausaga i faleoloa ma isi taleni faapea le toatele o fanau tupulaga ua faauuina mai Iunivesite ma faailoga tikeri. O vaaiga ia o le uluolaola o fanau a Samoa i totonu o Ausetalia nei ma sa faatumulia foi le Fiafia o le sisigafu‘a ia i latou nei.
Na faafiafia foi le alii pese ia King Faipopo ma le tamaitai o Ruta Janina Moaga aemaise ni pese na usuina e Alaalatoa Emani. Na vaaia le faafiafiaina o le ausisiva i le sosoo o pese a le faaili o le UNITED Band.
O le Aso Sa o le vaiaso nei, aso 9 o Iuni o le a faia ai se sauniga Lotu tele Tuufaatasi i le Whitlam Centre i Liverpool, sosoo ai ma le Aso Gafua, 10 Iuni lea ua atofa mo taaloga, faleaiga ma faafiafiaga.
O le a faafiafia ai foi faaili ma le karaoke mo soo se tasi e fia pese. E lē gata i lea o le a faapitoa ni taaloga ma ‘jumping castles’ mo le fanau. E momoli atu ai ma le faamanuiaga tele a Fono e lua mo le mamalu o le atunuu i lenei tausaga lona limasefulutasi o si o tatou malo pele.
Fono Aoao a Tagata Samoa i Sini La‘u Samoa Fono
Faufautua: Rev Iakopo Leleimalefaga Taitaifono: Alaalatoa Emani Alaalatoa
Taitaifono: Tavaga Teleiai Sonny Wilson Sui Taitaifono: Tauo Siaki Valu Toomata
Sui Taitaifono: Muagututi‘a Vailolo Siutu Failautusi: Perosi
Failautusi: Feagai Kirisome,Nifae Sita Teutupe: Aliitaeao Uati
Teutupe: Faumuina Lisa Parker, Vaele Ilalio Public Officer: Leuluaialii Agnes Passi
Public Officer: Leilua Jerry Uesele Komiti o Tapenaga: Papalii Lealaiauloto M Toomalatai
