“Ua toe faatasina ai foi le galuega lelei a leoleo”…Leaupepe Fatu Pula
“O loo taumafai pea le matou pulega e faia le mea silisili i le tautua faaleoleo, ae lē mafai ona alofia ai amioga a nisi o le aufaigaluega e faatasina ai pea le galuega lelei o loo faia e nisi o alii ma tamaitai leoleo”.
O le finagalo lea o le Komesina Lagolago, o ia o le Sooupu o le Matagaluega o Leoleo ma Falepuipui, le Afioga Leaupepe Fatu Pula ina ua tāpā sona finagalo e tusa ai o se isi mataupu i se tuuaiga o se faaoolima matagā faasaga i se alii leoleo e lei leva ona galue i le matagaluega.
“E fou le alii leoleo ma o loo galue i le vaega suesue lea e faapea na tupu ai le solitulafono”, na saunoa mai ai Leaupepe. Faaalia foi e le Sooupu o le matagaluega, o se tamaitai poo ua 20 tausaga le matua na agai i le ofisa o leoleo e fai sana tagi, ae aliali mai ai le gaioiga ua tuuaia ai le alii leoleo ua taofia lona suafa mo le taimi nei.
O le vaega e nafa ma suesuega i mataupu ma faaseā e aafia ai leoleo lea e ta‘ua o le Police Professional Standards Unit ua feagai nei ma suesuega o le mataupu lenei.
“E te silafia foi lau susuga i le tusitala, poo ai lava e fia avea ma leoleo e lē mafai ona iloa ona uiga ‘ailililo faapea, seia vaganā ua tupu mai se faaletonu”. O le finagalo lea o le Komesina Lagolago ina ua fesiligia i taiala o loo faaaogā e sailia ai alii ma tamaitai e fia galulue faaleoleo.
O le mau a le sui sooupu, e lē mafai ona lava ona natia soligatulafono e tulai mai e aafia ai nisi o le aufaigaluega ae o le faatinoga ua iai nei le pulega fou o le Matagaluega, o le tupu lava o se faaletonu ma faia loa le suesuega. Afai e lava ni molimau e faamaonia ai le tuuaiga, ona faia loa lea o moliaga faasolitulafono, ae faamalolo lē tumau se alii leoleo e faatalitali ai le taimi e valaauina ai i le faamasinoga ni moliaga.
O le alii leoleo o loo tuuaia na faaalia e Leaupepe o loo nofo vaavaaia poo le probation period. “Afai ae iai ni molimau e maua i suesuega o loo faia e faamaonia ai, e fai e le Komesina le faaiuga o lea alii ofisa ma faia ai loa ma moliaga”. E aliali mai lea tuuaiga i se isi alii leoleo o loo faatalia se faaiuga a le Faamasinoga Faaitumalo i moliaga e lima o le faia o ni amioga matagā ua faamaonia faasaga i se isi alii leoleo sinia, le susuga Fineaso Aimaasu.
O le Aso Lua o le vaiaso nei e lauina ai se faaiuga faasaga i lea leoleo asiasi poo se Inspector.
