O se tamaitai ofisa e gafa ma le tāina (typing) o faaiuga o mataupu tau Fanua ma Suafa lea na ta’u tuua’ia i le mataupu lea ua faamalolo ai le Sui Peresetene o le Faamasinoga o Fanua ma Suafa, Sevealii Panapa Vee ma le isi faamasino sinia, o Nanai Pologa Ioane. O le isi faamasino, Pouniu Siaosi Hazelman, lea ua toe tuu i ai le avanoa e toe a’e ai, ae iai lona tuutuuga a mae’a le aso 23 o Tesema e mae’a lelei ai lana konekalate, e lē toe tuua i ai se isi avanoa e toe faaopoopo ai nisi aso i lana galuega. Peitai o faamatalaga faamoemoeina mai i paaga aupito sili ona vavalalata i ai le tusitala, e faalua ona feau le tamaitai ofisa lea na gafa ma le tāina o le faaiuga lea ua vevesi ai, e sui o le komiti suesue a le faamasinog, e fesiligia i le mataupu lava lenei.
Fai mai le lipoti ua tuua’ia i le tamaitai ofisa le sese o le tāina o le faaiuga. Na teena e lea tamaitai lea tuua’iga, ona o lana faaupuga e na te lē iloa pe faapefea ona ia iloa gafa ma igoa o tagata ia ua tuua’ia ai o ia, ua ia type ina i le faaiuga.
O ia na o le pau lana galuega na fai o le type o le faaiuga tusitusia ua tuuina atu. O le vaiaso na tea nei lea na faatoa faamae’a ai le suesuega na gafa ma le Komiti Suesue ma tuuina atu ai le latou faaiuga i le Komiti a le Faamasinoga, ma aumai ai loa le faaiuga, o le faamalolo o le Sui Peresetene ma le Faamasino Sinia, ae toe faaauau le isi Faamasino se’i aulia le aso 23 o Tesema o le tausaga lava lenei. O se tulaga ua faaalia ai foi lagona ma faaseā a le atunuu auā ua lē gata ina alia’e ai ni faiga e aveese ai le faatuatuaga o le atunuu mai faamasino o le faamasinoga o Fanua ma Suafa, ae ua fesiligia ai le saogalemu ma le malupuipuia o measina a le atunuu. O mataupu tau Fanua ma Suafa e faapelepele uma i ai, auā o measina ma faasinomaga o aiga Samoa.
I le pepa o faamatalaga na aumai ai e le Ofisa Sili le faaiuga o le suesuega, ma o ia foi o le failautusi o le Komiti o Faamsinoga, Moliei Simi-Vaai, e na te lē o faailoaina mai le mafuaaga na ala ai ona mafua ona faamalolo le Sui Peresetene ma le faamasino sinia o le Faamasinoga o Fanua ma Suafa. Pau le tulaga o loo aumai i le pepa o faamatalaga e ese mai i le faaiuga, o loo maioio mai ai le faamalologa o faamasino i le vaega 29 o le tusi o Tulafono o Faamasinoga o Fanua ma Suafa 1981.
O le vaega 29 puipui 4 e pei ona faamalolo ai, o le malosiaga o loo i le Ao o le Malo, e faamalolo ai se faamasino o Fanua ma Suafa poo se Faatonu pe afai o se amioga ua lē taupulea, misbehaviour poo le “lē agavaa” e na te tauaveina le tofiga poo le faaperetania o le inability.
O le vaega lava lea o le tulafono o loo iai le malosiaga i le Ao o le Malo e na te aumai ai le faaiuga e faaauau ai pea sē ua tofia i le tofiga faa-Faamasino poo le galuega faa-Faatonu. O Nanai e faamasino i le Faamasinoga o Fanua ma Suafa, e faapena foi ona avea ma Faamasino tau faamasinoga fesoasoani poo le FF i le Faamasinoga Faaitumalo. O i latou uma o Sevealii Panapa Vee, Nanai Pologa Ioane, ma Pouniu Siaosi Hazelman, ua leva tausaga o galulue i ia tofiga i le Faamasinoga o Fanua ma Suafa. Peitai ua avea le tulai mai o lea mataupu ma vaega ua agai ai nisi o aiga na tagofia ei latou ia a latou mataupu e toe lagalaga i luga iuga o a latou faamasinoga. O le Komiti Faapitoa lea na o latou suesueina le mataupu na ta’ita’i e lē sa avea ma Loia Sili a le malo, o Brenda Heather-Latu.
