Tuuaia le Patele i se tamaitai, ifo Moseniolo i le nuu

O lea ua faamautu mai e le Ekalesia Katoliko ua sui le Patele ua tausia le matagaluega o le afioaga a Solosolo lea ua vaaia ai le Afioga Patele Penitito Mauga mai i le afioga Patele Nimo Pilimai sa ia tausia lea matagaluega.

O se mataupu o loo suesue pea i le taimi nei ma ua matuā teena e le afioga Patele Nimo lea ua mafua ai lea suiga ma o loo toatele foi sui o le Ekalesia Katoliko o loo vaeluaina i lenei mataupu ona o loo tele lava le lagolago o ave i le afioaga ia Patele Nimo, lea ua tuuaia i le aafia ai o se tamaitai talavou o le Matagaluega lea a le Katoliko i lea afioaga.

O lea foi ua iai le isi lipoti faapea o se alii talavou sa nofo ai i le maota o le Matagaluega na fesoasoani ai i le afioga i le Patele, na ma’ito ai le tamaitai talavou.

O se mataupu ma’ale’ale tele ae na feiloai lava le afioaga ma faapea ona suesue le mataupu, ma sa faaauau lava le galuega a le alii Patele. Ae o le faaiuga a le ekalesia Katoliko i Samoa, “…talu ai ua iai le masalosaloga i totonu o le matagaluega, e tatau ai lava ona fai le suiga e pei ona iai nei”.

O se faamatalaga lea na avane i le tatou ofisa ina ua tapa se finagalo o se sui o le Ekalesia i lenei mataupu.

O lea la ua lua vaiaso talu ona amata le Afioga Patele Penitito Mauga i Solosolo, ae ua i Moamoa nei le Afioga Patele Nimo, ma o loo faaauau ona faaali lona faanoanoa i nei tuuaiga ua faia faasaga ia te ia.

O le ifoga na ta’ua e sui o le Ekalesia, na faia ona o le taumafai o le Taitai o le Katoliko e faamalosia le nofo filemu aemaise i le va o le Ekalesia ma le afioaga.

O le popolega na ta’ua, ne’i fai fai faamatalaga ma tuuaiga mae’a ane ae tulai mai ai nisi vevesi.

O le afioga lava ia Moseniolo Alapati Mataeliga na faia le ifoga i le afioaga, ma na talia vave lava e le afioaga le afio atu o lana Afioga i le Akiepikopo ma sui o le Ekalesia.

O loo iai foi se isi patele sinia o le Ekalesia ua faapea ona malolo mai i ona tofiga, ma o le gasegase o loo ta’ua ua mafua ai ona lē toe faatautaia ona tofiga.

Ae o le patele lea ua iai foi tuuaiga i se faanunumi ma se sui foi o le Matagaluega sa galue ai ae o le faamatalaga ua aumai e le Ekalesia, e iai lapataiga na fai i le patele lenei ona o se pisinisi na ia faatu ma le tamaitai lenei e agai i ai masalosaloga o le faanunumi, ae ua lē usitai lava le Patele ma o se tasi foi lea o mafuaaga ua vaavaai ai le Ekalesia e talafeagai lava le faamalolo mai o le alii Patele mai i tofiga faaofisa o le lotu sa ia umia.

E fai lava nei suiga o loo feagai le Afioga i le taitai o le Ekalesia Katoliko ma gasegase o le tino, o lea e lei leva ona toe taliu mai foi Moseniolo mai i se taotoga o lona fatu i Niu Sila, ae ua fetaui ma faafitauli ua tulai mai i lenei foi taimi.

O le faamatalaga mai i le Ofisa o le Ekalesia i Malololelei, ua faasolo manuia lana Afioga i le Akiepikopo, peitai o loo iai nisi ana siaki e moomia le toe faia i Niu Sila ina ia faamautu ai le soifua maloloina o le taitai.