O le faatupula’ia o soo se ituaiga sauaga i totonu o aiga i Samoa, o loo tuua’ia ai le pitolaau a faifeau ma ekalesia eseese i le atunuu, e faapea e lē o lava la latou galuega fesoasoani e tuuitiitia ai lenei faafitauli poo le tafiesea ma le atunuu.
O le mau lea na manino mai i le suesuega a le lipoti, o le “Sailiiliga lautele i sauaga i totonu o aiga i Samoa 2018” lea ua mae’a ona faalauiloa i le atunuu.
O le sailiiliga na faatautaia faapitoa e le Komisi suesue i lalo o le fesoasoani a Malo Aufaatasi, ina ia unaia aiātatau a tagata soifua aemaise oi latou o loo moomia le puipui ma ia faamautinoa e malo a latou matafaioi tau aiātatau a tagata soifua.
Na agai le suesuega lea i le atunuu, e ala i faatalanoaga na faatino i le atunuu lautele, aemaise ai o faatalanoaga e lei fia faalauteleina mai i alii ma tamaitai na sauaina, o sui mai i matagaluega a le malo, aemaise o faifeau mai se vaega o Ekalesia i le atunuu.
O le sailiiliga la lea na manino mai le fautuaga a le Komisi na faatautaia le sailiiliga le lē lava o galuega o loo faatautaia e faifeau e fesoasoani ai i le mataupu. Fai mai le suesuega e ui ina atagia le maliliega i le gasologa o fefaasoa’iga o le sailiiliga, i le matuā tāua o le sao o le Lotu, peitai na manino lagona e lē o faatinoina i se tulaga e tatau ai ona oo iai le matafaioi a le lotu.
Fai mai le sailiiliga e tele lape poo ni vala o loo fesoasoani i le faaauauina o sauaga i totonu o aiga. Ma o lape o ta’ua e le lipoti, e aofia ai, le taumamao o faifeau mai le aulotu, e lē pei o taimi muamua, ua lē toe faatinoina ni a latou asiasiga i aiga e pei ona masani ai ma ua avea ai ma tulaga ua lē mafai ona iloa ni sauaga i totonu o aiga ma mafai ai ona fai se faatatau. Ua faateleina le avega mamafa tautupe e tauave e aiga e ala atu lea i le faamalosia o le tuuina atu faatauva i le lotu, ma i’u ai ina faatuputupulaia ia sauaga. E lē gata i lea, o le lē faailoa o le amiotonu i le faiga o molimau i amio a tagata o loo faatinoina sauaga i totonu o aiga ona o le lagona o le tiute tauave lea o le faiga o molimau, ma faapea ai ona faatuputupulaia le leai o se faasalaga o tagata o faatinoina sauaga.
Ua faapea foi ona tuua’ia le galuega a faifeau, o le iai o tagata faatino sauaga i totonu o le lotu o loo auina atu ai se feau o le taliaina o sauaga i totonu o lotu. I le faatusatusaga o le galuega a le lotu ma faifeau i isi itu tino e pei o le fono a nuu, o le malo ma le faamasinoga, e laitiiti le sao o le lotu i le puipuiga o sauaga i totonu o aiga, e ui ina o loo faamauina, e iai lava nai tagata toaitiiti ua afaina i sauaga, ua o i faifeau mo se lagolago ma se taitaiga poo ni fautuaga.
Fai mai suesuega, toeitiiti tasi mai se toasefulu o tamaitai na tali i le suesuega na manatu o le faifeau o se tagata aupito sili ona talafeagai e sulufai iai pe afai ua aafia i sauaga, peitai e na’o le 1.2% o tamaitai uma ua oo iai sauaga na fesiligia i le suesuega na o latou faaalia manino na o latou filifilia faifeau, e sulufai iai mo se fesoasoani.
O se fuainumera e atagia ai se faaletonu. O nisi ua o latou faaalia, o lo latou manatu e malu o latou faafitauli i faifeau, peitai, e matuā mamao a ia manatu, ona o se tasi lea o auala aupito vave ona faasalalau faalauaitele ai o latou faafitauli.
O nisi mau e faapea afai e faasoa i le faifeau, e mafai ona auala ai i lona faletua, faasoa e le faletua i sana uo mamae, o le uo mamae loa i le nuu atoa. E le gata i lea o nisi o lauga a faifeau, e faaautu lea i le tulaga maualalo ifo ma le lē usitai o fafine ia latou paaga.
E oo mai i le taimi nei e leai se faamatalaga aloaia mai i se ekalesia se’i vaganā se tasi o faifeau na ia ta’ua, e lē moni ia tuua’iga i le galuega a le lotu, ona o le pitolaau a faifeau o loo fai pea, o le talosia lea o soo se tasi ia latou talosaga.
