Tuuaia foi leoleo, leiloa faila i le tagi o le faaoolima

Ua lē taunuu ona mafuta le ulugalii faaipoipo, ona o le tamā o le alii faaipoipo o loo tuuaia i le faaoolima na manu‘a ai le tamā o le tamaitai faaipoipo

Ua atoa le tausaga talu ona faaulu i le vaega suesue o le ofisa autū o leoleo i Apia le tagi a se aiga i Vaoala faasaga i le aafia o se tasi o lea aiga, e faapea o se tamā ua limasefulu ma ona tupu tausaga lona soifua i se faaoogalima na faia e nisi o taulelea e aofia ai ma ni matai.

O le faaoolima na mafua mai i se fiafia o se faaipoipoga lea na faapaia ai le alo tamaitai o le tamaloa na aafia i le faaoolima ma se taulealea e faapea o se atalii e faasino i nisi o loo tuuaia i le faia o le solitulafono.

Na faamatala ma le faanoanoa se tasi o le aiga o le tamaitai faaipoipo i le ogaoga ma le matuiā o manu‘a o lē na aafia le tamā lea o le faato‘ā nofotane lea na aafia ona foliga ma toulu ona nifo e 4.

Na taunuu le aiga i le faia o se tagi i leoleo, peitai na faaalia e le molimau o se isi o le aiga, sa faia le suesuega peitai na tuu asiasi pea i le ofisa suesue o leoleo poo afea e mae‘a ai suesuega ma valaau foi ni moliaga o nisi e masalomia.

Talu mai Mati o le tausaga ua mavae na faaalia e le molimau e lei valaauina lava le mataupu i le faamasinoga.
Na saili loa se fesoasoani e le aiga i le Toomaga mo Tagata Puapuagatia (Samoa Victim Support Group) ma faapea ona sailiili ai i leoleo poo fea ua fai i ai le mataupu.

Na logotala le aiga, o le alii leoleo na nafa ma le tagi, ua lē toe galue i le ofisa suesue (CID) ae ua galue i se isi vaega o le auaunaga a leoleo le General Policing poo le GP.

Peitai ua maua ni molimau e faapea ua leiloa le faila o suesuega. “O le mea ou te fai atu ai, o taimi uma na matou asiasi ai i leoleo na fai mai o le aso lea e valaau ai, ae matou o atu i le maota faamasino e leai se mea”. Ua oso ai o matou masalosaloga ua togafalea ona fai e le leoleo le mataupu”. O le finagalo lea o se sui o le aiga na tuuina mai.

Talu mai le vevesi na tupu i le fiafia o le faaipoipoga na faaalia e le molimau, e lei taunuu ona mafuta le ulugalii fou na faapaia ona o le tuaa o le alii faaipoipo o loo tuuaia i le faia o le faaoolima faatasi ai ma nisi o taulelea o le aiga sa iai i le fiafia.

O le galuega a le Toomaga mo Tagata Puapuagatia na tete‘i ai le aiga o le tamā na aafia i le faaoolima, ua tutū atu ma le faaupuga ua o atu e toe fai suesuega ma tusia faamatalaga.

Peitai o popolega o se tasi o matai talavou o le aiga, o le lipoti a le falemai i manu‘a na aafia ai le toeaina ua latou maua ni molimau e lei mafai ona latou faamaonia, ua leiloa.

O loo taumafai e toe saili le lipoti lea ona o loo iai faamaumauga tonu o manu‘a o lē na aafia. Ua faailoa mai e se molimau i le ofisa autū o leoleo, o se isi lea o mataupu ua toe suesueina ina ua faatulaga ni faiga faavae fou i le tagofia o tagi e faaulu atu i le matagaluega. Faaalia e le molimau, o le leoleo na faia muamua le suesuega o loo tuuina atu i le vaega o amioga taualoa le Police Professional Stanadards mo se suesuega.