O loo ua faagasolo i lenei vaiaso ni suesuega a le Falemai tele i Motootua i se mataupu ua tuua‘ia ai e le aiga o se tama talavou le maliu o lea tamaitiiti ona e masalomia e sese le tui na ave i ai mo ona togafitiga.wz
O le tamaititi ua maliu na faaalia i luga o fesootaiga o le facebook le mafatia tele o lona tina ma ia faamatala ai o le Aso Lulu o le vaiaso na tea nei, na agai ai ma si ana tama mo ona tui masani.
E faapea faamatalaga o le tamaitiiti lea o se tasi o le toatele o fanau ma le tupulaga talavou o loo ua maua i le fiva rumatika ma e faagasolo faavaitaimi tui, o se vaega lea o togafitiga mo lea gasegase. O le Aso Lulu lea na faamatala ai e lona tina le mae‘a o ona tui o lona atalii savavali mai loa e agai i fafo o le falemai ae toe palasi lava lana tama ma e toe laga atu ua maliu lava lona atalii.
E lei tali mai le aiga i se talosaga e faatalatalanoa lenei faalavelave peitai o luga o le facebook ua faalauiloa ai ata o le tama ua maliu ma manu‘a pei o ni uno‘oa o le tino ua vaaia i vaega eseese o le tino o lenei tamaitiiti ma na tapue uma e ona aiga ina ua maliu o ia e pei ona faaalia ai e sui o le aiga e foliga mai o se tamaitiiti na pa‘u i se niu totoulia o le tino o lenei tamaitiiti ma mafua ai lava tuua‘iga e foliga mai ua sese le tui na tui ai lea gasegase. E ofo lona tina i le vave tele ona sui o si ana tama ma maliu atu ai lava.
Na tapa se finagalo o le Auaunaga faasoifua maloloina (National Health Service) i lenei mataupu ma ta‘ua ai e Maatasesa Samuelu, o le ofisa sili lagolago o lea auaunaga e moni ua oo atu i le latou pulega le mataupu lea ma o loo faia nei i ai suesuega i le mafuaaga o le maliu o lea tamaitiiti.
Na ia faamaonia foi o le tamaitiiti lea ua maliu o se gasegase o le fiva rumatika ma o lona uiga, e tatau ona i ai tui e togafitia ai lea gasegase ma e faatulaga sa‘o lava le taimi e faia ai nei tui.
E lē o mafai la ona ta‘u mai e le Auaunaga se mafuaaga tonu lava o le maliu o lea tamaitiiti ae e lua vaiaso lea ua tuu atu mo le faamautu ai o faamaumauga ma suesuega i lenei mataupu ona faatoa mafai lea ona ta‘u mai le mafuaaga tonu e pei ona fesiligia ai.
Ua tele lava foi ni faamatalaga o lenei foi mataupu ma ua faapea mai nisi o se tausi soifua faatoa mae‘a mai aoaoga lea na faia le tui o le tamaitiiti ae e lei faamaonia mai lea tulaga e le falemai tele.
