“O nisi o o tatou aiga nei o loo tutupu ai faaletonu”…Palemia
E toalua ni alii na galulue i avanoa o galuega faavaitaimi i Niu Sila o le tauina o le fualaauaina suamalie o le apu, na molia e leoleo i Niu Sila i le faamalosi o se teine papalagi. E iai nisi na sosola ma galuega e lei mae‘a le taimi na aiaia e mae‘a ai.
O nisi na tauai fusu ma faaoolima i nisi tagata. O isi na maua a latou faanunumi ua sosola ma fafine o to’alua o isi tamaloloa na mamulu atu i galuega nei i Niu Sila ona o le fia maua o se seleni, ae aliali ai ia uiga faaluma aiga ma atunuu.
O nisi e lei fia ni vaiaso ma ni masina talu ona tuua lona toalua i Samoa ae alu e tau apu, ae oso le toe fia foi i Samoa ona ua manatu i le avā.
Na saunoa le alii Palemia le susuga Tuilaepa L Sailele Malielegaoi, e lē agavaa ni tagata faapea e maumau ai le avanoa o loo fia maua e isi tagata.
O nisi na sosola ma le toe foi i Samoa ina ua fautuaina e o latou aiga i Niu Sila o le a faitalia latou ma faatino o latou pepa nofomau.
Na tolaulau uma e le Palemia nei faaletonu i se feiloaiga ma le au tau apu na faia i le Aso Lua 26 Oketopa 2010 i le maota Samoa o le Pulega o Tagata Tafafao o loo i le eleele fou i Apia.
O le feiloaiga i le vaiaso ua mavae a le alii Palemia ma sui o lana matagaluega o loo nafa ma le faagaioia o avanoa o galuega faavaitaimi, ma i latou ua foufou malaga i Niu Sila i le masina nei o Novema ma faasolosolo atu ia Tesema, Ianuari ma Fepuari o le tausaga fou mo galuega i faatoaga i Niu Sila mo se vaitaimi, ona o le naunautaiga o le Malo ia ave se fautuaga lelei ma se fautuaga faatupu mafaufauga lelei ia i latou, ina ia alofia ai le toe tulai mai o ni faafitauli.
O se taimi muamua lea ua faia ai se feiloaiga faapea e pei ona saunoa le ta‘ita‘i o le Malo.
Na saunoa Tuilaepa o nisi o aiga Samoa i Niu Sila ua latou faatupu ni tulaga ua tauvalea ai le igoa lelei o le atunuu i le polokalame o galuega faavaitaimi.
“Ua masani ai nisi o o tatou aiga, a alu atu loa le tama e tafao ona faapea lea, nofo laia aua e te toe alu faitalia matou ma fai ou pepa, o le mea sili ua e oo mai i Niu Sila”. Na faaalia e le Palemia e matuā leai se aiaiga faapea i lalo o le polokalame.
“O soo se tagata e fia nofomau i Niu Sila e foi lava i Samoa pe a mae‘a le galuega e talosaga ai i le quota, ona fai lelei ai lea o pepa”.
O nisi na tulai mai ai ni faaletonu faapea ina ua sosola i o latou aiga ae lei mae‘a galuega ma toe foi i Samoa, na ta‘ua e le Palemia ua maua uma lava e leoleo ma le aufaigaluega a le vaega o femalagaiga a Niu Sila ma ua toe faafoi uma i Samoa.
O le isi lua vaiaso o lumanai o le a malaga ai i Niu Sila le alii Palemia e feiloai ma i latou o faatinoina galuega faavaitaimi.
O le a feiloai atu ai foi i nisi o le aufaigaluega mai Samoa. O ni avanoa lelei tele e pei ona faaalia e le Palemia o loo maua ai ni seleni lelei auā le atina‘e ma fuafuaga a aiga i Samoa.
