Tuua Middlemore e Dr Leavasa fia fesoasoani Red Cross Samoa

I le aso na sosoo ai ma le sunami i Samoa, na tuua ai e le alii fomai o Neru Leavasa 25 tausaga, lana galuega i le falemai o Middlemore i Mangere, ae malaga atu loa i Samoa faatasi ma lona toalua ma tuaa, mo le fia fesoasoani soosoo tauau i le galuega laveai a fomai aemaise le Red Cross i Samoa.
E tolu masina sa galue ai Dr Leavasa i le falemai i Motootua a o saili lona tusipasi faafomai, tusa ma le lua tausaga talu ai.
Sa ia feiloai i Apia ma nisi o fomai fia fesoasoani mai Niu Sila, ona latou malaga faatasi lea i le nofoaga o loo faamautu ai le faalapotopotoga o le Koluse Mumu i totonu o Lalomanu, ma latou galulue ai loa faasolo i le nuu o Satitoa ma Saleaumua, e togafiti manua o tagata lavevea mai faiga a le sunami.
E tasi le vaiaso na auai ai le alii fomai i Samoa ae toe taliu mai i Niu Sila, aua galuega o loo feagai ai.