Tuua e le EFKS Vaigaga laufanua o Brisbane ma le 48 afe tala Ausetalia

Ua pati taoto le Feepo. Ua tata faa-alii, taavale ulupoo ae siva Salevao. O ni lagona fiafia ia ma le faagaeetia na tutupu a‘e i manatu ma finagalo o le faigamalaga mamalu a Sui o le ekalesia EFKS mai le alalafaga o Vaigaga.
O le afio lava lea o le alo o Malietoa, Lau Susuga Seiuli, o le Mamalu lava lea o le Falefia o alii, ma lau Fetalaiga Ulugia, o le paia lava lea auā Faleata ma le gafa.
E le falala fua se niu, e iai nisi o galuega e fia faalelei i totonu o le lotoifale o le Ekalesia EFKS a Vaigaga i Samoa, o le ala lea ua savalia ai le ala o le mativa i Ausetalia nei. Na to‘ai taunuu le latō i le ea i le vaisao ua tuanai, ae o lona Aso Toonai na sei mavae atu nei, (13/02/2010) sa faataunuuina ai le faamoemoe e ala i faafiafiaga matagofie ma saasaaga a le aumalaga.
Sa faamautu uma lenei faigamalaga ma nofotasi i le laoa ole tofa ia Lealofi Lausei Pritchard ma le tausi ma le aiga-alii ae faapea ona tuuasiasi atu le paia ma le mamalu o le Mafutaga.
O le soosoo tauau ma le lagolagosua a le mafutaga a le afioaga o Vaigaga i Brisbane nei sa faigofie ai le tausiga o le aumalaga. E moni lava nisi fuaitau, ‘o le tele o lima e māmā ai se avega.’
O nisi o le laulau-a-fono o le mafutaga i Brisbane e aofia ai le Afioga i le Taitaifono le Susuga i le Faafeagaiga EFKS ia Milo Faaleava.
O se tasi lenei o faafeagaiga e lagolago malosi i le tele o faamoemoe a alalafaga mai Samoa. O le Susuga ia Milo Faaleaga o loo galulue ma le faletua ia Talamasinei i le Ekalesia EFKS i Brisbane.
O le teuoloa o le faletua ia Joyita Stanley-Slade. O le tofa a Lealofi Lausei Pritchard, o le ‘aao tusitusi lea o le mafutaga a le afioaga o Vaigaga i Brisbane, sa fai foi ma fofoga o le aso. O ia sa faatulima ma saunoa foi i se lauga faafeiloai auā le mamalu o le auvalaaulia ma Samoa na potopoto.
O le Susuga a Tuiloma sa fai ma sui o Pule ma Tumua ma aiga o Samoa sa auai e molimoli atu se agaga faafetai tele i le Faletua ma le aumalaga a le Ekalesia EFKS mai i Vagaga aemaise le Mafutaga.
O le Afioga Laulu Henry Taefu na fai ma sui o le aumalaga mai Samoa e tali fuaitau mai i le saunoaga a le auvalaaulia, o ia foi o le Failautusi o le Komiti o Atinae a le EFKS i Vaigaga i Samoa.
Saunoa Laulu, ona o le maualuluga o faaaloaloga ma le alofa tulai o aiga, uo ma ē masani i le talalelei o loo alaala ma papaaao i Brisbane. “Ua malie le faga i foa, ua malie foi le faga i puna, ae atuē le faga i pa‘au aua ua tofu malemo le Tagaloa Aopo, ae inu malie le fale-selau e pei o upu i le motu o Salafai auā ua faamalieina le aumalaga atoa”.
O upu o le mavaega a Malietoa ma le Tuifiti, ‘o lau faaaloalo Samoa o le a ou le paleina i lo‘u ulu pe ou te seiina nei lelea i le matagi, ae o le ‘a teu i le va o lo‘u fatu ma lo‘u māmā e manatua ai seia oo i le oti. FAAFETAI, FAAFETAI TELE!
E $48,000.00 Ausetalia ua talisapaia fatua-o-eleele ma afifi lelei e le faigamalaga mai le afioaga o Vaigaga i Samoa e tusa ma le latou faafiafiaga. O le Aso Lua na tuua ai e le faigamalaga Brisbane ae tuuvaa atu i Sydney mo le latou faafiafiaga mulimuli ma sauni ai e taliu atu i Samoa i le aso 21 o le masina lenei o Fepuari.
O nisi nei o le aumalaga mai Samoa e aofia ai le Faletua ia Naomi Tautua Auelio, o le faletua o le faafeagaiga o loo tapuai mai Samoa. O le taitai o le Komiti o le afioga sa malaga mai, o le Afioga Faumuina Wayne Fong. O le Failautusi, Afioga Laulu Henry Taefu.
O nisi o sui sa malaga mai o le Afioga Leitufia-o-Atua Mati Luamanuvae, le Tofa Sooalo poo le Afioga Anae Mene, le Tofa Lofipo Poasa Toia, o le isi sui o le aumalaga, o le Tofa Leatinuu Patea Ray Taefu, aemaise foi le Faletua ia Ramouner Fong, Faletua ia Leonē Toia Perez, Faletua ia Sosefina Luamanuvae, Faletua ia Rosa Sooalo, Faletua ia Lemina Toia ma le tamaitai ia Ruta Folau.
Ia faamanuia le Atua e tusa ai ma le faasavalia o fuafuaga a le Ekalesia EFKS mai Vaigaga Samoa i Brisbane nei.