Ua atoa le vaiaso na tea nei o faia ni faasalalauga faalauaitele a le Kamupani o Telefoni Feaveai le Digicel, ua fautuaina ai le mamalu o le atunuu o loo latou faipaaga ua amata i le aso 1 o Iulai siitaga o le telefoni foi lea e ta‘ua o le Digi Fixed.
O se telefoni lea e tele ina faaaogā i le fale e pei o telefoni fale a le BlueSky Samoa-Tel.
O lenei siitaga na ta‘ua e lenei faaaliga faalauaitele, ua faia ina ia usitaia ai se faatonuga a le Ofisa o le Pule Faatonu o mea uma tau Fesootaiga i Samoa.
Na taumafai le tatou ofisa e saili se faamalamalamaga o lenei faamatalaga ae e lei manuia taumafaiga i fesootaiga ma sui sooupu o le Digicel i Apia o Tala‘i Jnr ae faato‘ā maua mulimuli ane o loo i Aukilani i Niu Sila mo ni galuega a le Digicel.
Sa maua le alii o loo Sui Pule o Alex Abraham ma fesiligia loa e faamatala mai le uiga moni o le faasilasilaga. Sa iai se faamasinoga na faia i le va o le Digicel ma le Pule Faatonu i le amataga o le tausaga ma na fesiligia poo se vaega lea o le iuga ina ia siitia tau o auaunaga nei a le Digicel ae na faaalia e lenei alii, e lē o le faaiuga lea ua mafua ai siitaga ae o se isi mataupu.
Na ia faapea mai, e tusi atu i le imeli ni fesili ona mafai lea ona faamatala mai.
E oo lava i le taimi e avatu ai lenei lipoti e lei toe tali mai Abraham i fesili na tuu atu i le imeli.
O le siitaga lea ua iai nei ua silia i le 100 pasene, mai i le 9 sene i le minute sa mafai ona faaaogā ai pe a vili i se isi Digi Fixed poo le telefoni fale a le Samoa-Tel i le 25 sene lea ua faalauiloa mai.
Na maua le avanoa i le alii Pule Faatonu o Donny de Freitas ma na ia faapea mai, “Fai i le Digicel pe aisea ua faato‘ā faasa‘o ai ana tau i le taimi lenei ae ua leva e lei faia.”
O lea e pei ona fesiligia ai le sui o le Digicel ma le Pule Faatonu na lāgā ai foi le tulaga o faiga faatauvaga o tau o auaunaga a kamupani e lua o telefoni feaveai i totonu o Samoa, le Digicel ma le Samoa-Tel lea ua Blue Sky Samoa-Tel.
Na maua ai le telē o le eseesega o tau o ia auanaga aemaise lava la i le ituaiga telefoni lea ua ta‘ua o le Digi Fixed. Faaalia i lea iloiloga e foliga mai ua matuā faapa‘ū lava e le Digicel le tau o ana auaunaga ma atonu o se mea lelei tele lenei i le mamalu o le atunuu o loo iai ia ituaiga telefoni ae o se faiga ua afaina ai faiga faatauvaga ma le Samoa-Tel.
Peitai o lea na ta‘ua e Abraham e lē o le faamasinoga lea ua mafua ai lea suiga ma o lea la e faatalia pea sana tali mai i fesili na tuuina atu.
