E toalua ni alii faamasino na lipoti mai le matuā fufusu lelei lava i le Maota Faamasino i Mulinuu i se aso o le vaiaso na tea nei.
Ua maua ua faamalolo lē tumau mo le vaiaso atoa ona o lenei feeseeseaiga na iu ina pa‘ilima ai ia tamalii.
O le isi alii faamasino o se tasi o le Pulega o le Faamasinoga o Fanua ma Suafa ae o le isi o se isi foi tamalii ua tele tausaga o tautua o se Faamasino i lea vaega o le Auaunaga tau Famasinoga.
O le faamatalaga e faapea, o le iuga o se faamasinoga na iloiloina i luma o le Faamasinoga o Fanua ma Suafa na mafua ai feeseeseaiga ma tulai mai ai loa ma le fusuaga i le va o nei taitai o le Faamasinoga.
Na tāpā se taimi ma le Ofisa Sili o le Ofisa o Faamasinoga peitai na auai atu i se fono a le Palola sosoo ai ma se fono a le Komisi o le toe fuataina o tulafono, ae na vave ona tapa e lana failautusi poo ai ua maua mai ai e le tatou ofisa lenei lipoti, ae na faaali i ai e matuā toatele tusitala o loo feoai i lea nofoaga ma o ina na maua mai ai lea feeseeseaiga ma na ta‘ua e lenei tamaitai – e le mafai lava ona fai mai se faamatalaga a se isi i lenei mataupu se‘i vaganā ai le alii Ofisa Sili.
O le faafitauli o le aso e sosoo ai e malaga ai i Savaii le Tofa Masinaalupe Tusipa. Na toe talosaga i ai ma tuu i ai le telefoni pe mafai ona toe vili mai e faamautu ai le mafuaaga o le feeseeseaiga a nei taitai o le Faamasinoga o Fanua ma Suafa.
E iai isi lipoti ua oo mai e faapea, o le iloiloga lea na tulai mai ai lea feeseeseaiga, e toatolu na tutusa le latou faaiuga.
O le isi toalua na teena le faaiuga ma o iina na finau ai loa ma le tagata lava ia ua unai le mafuaaga o faaiuga ua finagalo i ai.
O feeseeseaiga la na iu ai loa ina vaaia le talai o laei a luga o faamasino ma pa‘ilima ai loa.
O le taimi muamua lenei ua tulai mai ai se mataupu faapenei, ma oloo tālia nei la poo le ā tonu le isi laasaga o le a oo i ai lenei fusuaga, ae pe o le ā foi le faaiuga na faia i le mataupu na mafua ai lenei vevesi.
