Tuu avanoa le faamasinoga i tamaiti o le kegi gaoi i Apia

(E sili atu le mafuta i matua i lo le mafuta i pagota)

O se avanoa Faaauro e le aumaua, le avanoa ua tuuina atu nei e le Faamasinoga Maualalo, e tauala mai i le alii Faamasino, Vaepule Vaemoa Vaai, i le faamasinoga o ni tamaiti se toalua i le Faamasinoga mo Tupulaga Talavou.
Mo le silafia e le atunuu, e le mafai ona faailoa suafa o nei tamaiti i le poloaina a le faamasinoga, i le puipuia o latou olaga talavou mo le agai i le lumanai. O nei tamaiti e toalua, o le toavalu ai lea o tamaiti laiti o le kegi gaoi i le taulaga i Apia, ua faamauina o latou ata ma faamaumauga, i le tele o aiga, pisinisi ma faleoloa e oo i Kamupani, ua toesea a latou meatotino faapea le faaleagaina o faitotoa ma faamalama o fale i nei kegi gaoi.
O taimi o osofaiga a nei tamaiti, o le vaeluaga o le po aemaise taimi e tuua ai e aiga o latou maota.
O nei alii e toalua, e silia ma le $2,000 le tau aofai o meatotino sa gaoia, o nisi meatotino e toe maua, ae o le tele lava ua mou i le vasaloloa, e pei ona faaalia e leoleo.
O le laiti o nei alii, ae na latou sioina se alii ma sana uo tamaitai i tua o le Maota o le Malo i Matagialalua, ma faamatau ae ave le tupe. O nei moliaga sa ioeina uma e nei tamaiti.

Talosaga a Leoleo

Ua talosaga le Ofisa o Leoleo i le faamasino, ina ia tuu atu i nei tamaiti se Faasalaga Faafalepuipui, ona o le molia soo o laua ma nisi tamaiti i le gaoi ma le talepefale.
Tamaititi Fugalei

Ua fai ma ia le gaoi ma le talepefale. Ua 14 ona tausaga ma ua leva e lei toe aoga. O loo molia foi i le umia o laau faasaina poo mariuana. Na faaalia e lona tina i le Faamasinoga, o lana tama lea sa muta ana aoga ina ua ia iloa ua aafia i le faiuo ma le mafuta atu i nisi tamaiti. Ma o lea o le a taumafai e toe ave i le aoga. Ua talosaga foi le tina ina ia toe tuu atu se avanoa mo lana tama, e faaleleia ai lona olaga.

Tamaititi Lalovaea

Ua 15 tausaga le matua. Faapea foi ona le toe aoga, ma ua molia soo i le gaoi ma le talepefale. Na faaalia e lona tama i le Faamasinoga, na faateia o ia i le tutu atu o Leoleo e uiga i lona atalii. Sa taua ai e lea tama, o le lua ai nei o tausaga la te lei toe feiloai ma lona atalii. Na aafia lona olaga i le faiuo, aemaise o le tuu atu e alu i le aoga ae le aoga. Sa tonu i lona mafaufau e sili ona tuu ai faapea aua ua fiu e fasi, toe o le mao ai i lona atalii, ae ua matua faateteleina le leaga o le amio.
Afai e momoli atu i le latou aiga, e na o sina taimi lava toe sola ma nofo i le alii lea i Fugalei poo Sogi foi.
Ua talosaga lea tama i le Faamasinoga, ina ia toe tuu atu lava se avanoa mo lona atalii. E ui o ia ua toe fai le isi ona toalua, ae atonu o le a aoga le la toe mafuta o le a fai i ai se aoaiga mo ia. Na te talitonu, o lona toe vaaia o lona atalii i lea avanoa atonu o se avanoa taua lea e toe timata ai lona olaga.
Ae afai o le a le toe usitai lona atalii ia te ia, o le a ia toe lipoti leoleo poo le Ofisa Faanofo Vaavaaia.
Ua talia e le afioga i le Faamasino, Vaepule Vaemoa Vaai, le talosaga a nei matua e tusa o nei alii poo fanau foi.
Taua e Vaepule, e augofie tele le Faamasinoga e talia le talosaga, aua e sili atu le mafuta i matua i lo le mafuta atu i pagota. E tatau foi ona taua ia laua le malupuipuia o maota ma laoa o aiga faapea ma faleoloa.
Faaalia foi e le Faamasino, o lea ua taunuu atu le talosaga a Leoleo mo se faasalaga faafalepuipui mo nei tamaiti.
E ui lava la i le talosaga a Leoleo, aemaise o le mafatia o aiga ma i latou e ana meatotino, ae ua manatu le Faamasinoga mo se toe avanoa lava se tasi mo nei tamaiti.
O le faaiuga a le Faamasinoga, o le a tuu atu nei tamaiti i o la aiga mo le vaaiga. E 18 masina o le a nofovaavaaia ai. E faasa ona toe o ese mai la aiga i le 6:00 i le afiafi i le 6:00 i le taeao. Ua sa ona toe feoai ma nonofo faatasi. E tai 100 itula o le a faigaluega ai i tagata lautele o le atunuu e le totogia.
E na o le alii 14 tausaga mai Fugalei, o le a toe tulai i le Faamasinoga i le aso 6 o Aokuso, i le lauina o le iuga o lona Faamasinoga i le umia o Mariuana i le maketi i Fugalei.