Ai o le taaloga lea ua tatau ona faaigoaina o le fusu tagi, e fusu lava seia matuā tigaina ma ave i le falemai.
E faaiu le taaloga i le va o Mark Hunt ma Antonio Silva le alii Brazil, ua matuā masofasofa lava o la foliga i le matautia o le fetauiga a le toalua lea i le Aso Toonai o le faaiuga o le vaiaso i Brisbane Ausetalia i le taamilosaga a le UFC (Ultimate Fighting Championship) le mixed martial arts e pei ona sa faagasolo.
Ua faaigoaina o se fusuaga pito i matautia i le talaaga o au paga mamafa i le lalolagi a le UFC. O Mark Hunt o se alo o Samoa, sa avea ma siamupini o le K-1 i le lalolagi ma o loo taalo nei mo Niu Sila i le mixed martial arts.
O le po o le Aso Toonai na tea nei, na faagasolo ai le taamilosaga a le UFC fight night 33 i le Brisbane Entertainment Centre, fetaui ai ma le alii Brazil o Antonio Silva sa lu‘iina le fusi o le aupaga mamafa i le lalolagi i le amataga o le tausaga nei, lea na mae‘a lelei taamilosaga e lima o le la taaloga, i le matuā tau fai tigaina o le paga lea ma faaiu ai i le tietie o Mark Hunt i le taavale a le falemai ona o le ogaoga o manu‘aga sa aafia ai.
E ui i le tau fai malolosi o itu uma e lua, peitai o le tolu taamilosaga muamua na faamo‘amo‘a ai e Hunt lana paga i le sasau o le agavale ma lavea ai le Brazil.
E lei tuumāmāina foi e Silva le aao agavale o le tamaloa, i le tauna lelei o le a‘a malosi ma pa‘ū ai Hunt.
E ui i le malolosi ma le vavave o vae o le Brazil na taotaomia ai i lalo le alii Samoa, peitai e lei faavaivai ai foi le apakaki o le taumatau malosi o Hunt ma sao ese mai ai ae faaauau le taaloga i le taamilosaga tolu.
O se taaloga matautia le finau, ina ua toe faalava si mea malosi a le Brazil, tauna lelei lava ma lavea ai le tatou tama i le taamilosaga fā, toetoe lava a lē toe mafai ona fusu. Peitai na faaauau lava ma e mae‘a ane le taamilosaga lima, ua tau lē feoai lima ma vae o le toalua lea ua tigaina tele o la manu‘aga.
Ta ane ai lava ma le logo e faamae‘a le taamilosaga mulimuli ua vaivai le aupaga, ma o le iuga, e tutusa le taaloga. E ogaoga tele manua‘ga o Mark Hunt e pei ona ripotia mai, o loo gau le lima, gau le ‘o‘o toe leaga ma foliga. Ae talosia ia toe vave faafoi le malosi, auā nisi o ana taaloga o loo loma mo le lumanai.