Mae’a le Misasa o Iesu le Tupu ma le faamavaega ma le afioga ia Patele Epati Tamati Aiolupotea

Mae’a le Misasa o Iesu le Tupu ma le faamavaega ma le afioga ia Patele Epati Tamati Aiolupotea

O le Aso Sa ua tuanai sa faamanatuina e le Ekalesia Katoliko i le lalolagi le aso faapitoa “O Iesu le Tupu” lea sa tuufaatasi ai foi ma Senakolo e 6 i totonu o Kuiniselani i le sauniga paia o le Misasā. O le sauniga foi lea na faamavae atu ai le afioga Patele Epati Tamati i Senekolo e 6 o le Divine Mercy.

O se lauga faamomoiloto, ma se saunoaga logomalie, ae na po’ia ai foi ma lagona faanoanoa ona o le misia o le mafutaga mafanafana. Na tutulu ai le toatele a’o saunoa faamavae ai le Tamā faaleagaga le afioga ia Patele Epati Tamati Aiolupotea, e faamavae atu ai i Senakolo e 6 (Divine Mercy) a Kuiniselani. E faate’ia le toatele i lenei fesuia’iga a le ta’ita’i o le Pule’aga Katoliko Samoa i Kuiniselani.

O le aso taupoina lenei na atofaina mo le Divine Mercy lava ia a Woodridge i le latou Misasā, peitai na autasi finagalo e tuufaatasi ai ma isi uso a Senakolo ona ua utiuti le taimi lea na afua ai le faatasiga matagofie i le Aso Sa aso 25 o Novema sa faia i le Palisi a St Paul i Woodridge.

MC pito i luma Alofipo Afakasi ma le aufaafiafia Divine Mercy a Woodridge

MC pito i luma Alofipo Afakasi ma le aufaafiafia Divine Mercy a Woodridge

Na faagasolo lava polokalame masani, ma avea ai le ta’ita’i o le Divine Mercy a Darra le susuga ia Misa Iosefa Aloniu e faafeiloaia le paia o Samoa sa auai faapea isi Senakolo. Na faatinoina foi le ifoga, lea sa pulolou ai i le ietoga ta’ita’i uma o Senakolo e 6 mo le faamagaloga, ae toe faatulai e le afioga ia Patele Epati Tamati.

O le afioga Paia a le Atua sa faitauina e le afioga ia Laufilitoga Alofipo Afakasi (ta’ita’i Divine Mercy Woodridge ae o le tofa ia Motuopuaa Ropati sa fofogaina le faitauga lona lua (Ta’ita’i Divine Mercy Jindalee).

O le ta’ita’i aoao o Senakolo e 6 (Caboolture, Jinadalee, Inala, Goodna, Darra ma Woodridge) o ia foi le ta’ita’i a Inala le tofa ia Tolu Pisa sa feagai ma talosaga lautele. O le Divine Mercy a Woodridge sa momoliina le taulaga sa fai foi ma fofoga o le faamoemoe le latou ta’ita’i (Alofipo Afakasi).

Taupou ma sogaimiti Divine Mercy sa momoliina le taulaga

Taupou ma sogaimiti Divine Mercy sa momoliina le taulaga

Ua atoa nei i le 2018 le 18 tausaga talu ona galue le afioga ia Patele Epati Tamati Aiolupotea e avea ma ta’ita’i o le Puleaga Katoliko Samoa i Kuiniselani. Sa lei ‘asa le tele o maa faalavea aao i le ala i lenei savaliga umi, ma auala a le fili peitai na maualuga le agaga faafetai o le Tamā faaleagaga le afioga ia Patele Epati Tamati Aiolupotea, ua tele nei tausaga na ia faia ai le mea sili mo ona tagata Samoa i lenei aai ae faasili ai lana auaunaga i le Atua.

Ua faamoemoe o le Aso Sa aso 2 o Tesema e lauga faamavae ai i le Misasā a matagaluega e lua (South & North) e faia lava i Woodridge ae o le aso 16 o Tesema o le Misasā a Inala.

O le fetalaiga ia Ape mai le Ekalesia Katoliko a Marsden na fai ma sui o le auvalaaulia e faafetaia le fale 6 mo le taumafataga ma faaaloaloga. O le faamavaega ma le afioga ia Patele Epati sa galulue faatasi uma iai Senakolo uma e ala i faafiafiaga matagofie sa maimoaina faatasi ai ma a latou meaalofa tupe sa tauaaoina e faailoa ai lo latou agaga faafetai ma le alolofa moni. E tele le alofa foai sa sasaa i lea aso ona o le misia o mafutaga ma lana auauna.

Na saunoa le ta’ita’i o Senakolo e 6 le tofa ia Tolu Pisa, o le a faia le fono a le Divine Mercy i le aso 6 o Tesema ma iloa ai taualumaga o lenei tausaga ma le tausaga fou ona o lea ua tuua na o latou, e lē o iloa nisi fuafuaga o le lumanai ise isi tama faaleagaga e toe tulai mai.

Autalavou a Inala faatasi ma le ta’ita’i ia Tolu Pisa ma le faletua ia Nila sauni ia latou faafiafiaga

Autalavou a Inala faatasi ma le ta’ita’i ia Tolu Pisa ma le faletua ia Nila sauni ia latou faafiafiaga