“O au a ia ua ou fai atu i lau fanau, ou te matua le toe fia nofo a i tai. Poo le a le lelei o fale ua faaleagaina ou te le toe fia nofo a i tai”.
O le faamatalaga lea a le tina o Afeane Faleilua Oge Moimoi o Saleaumua Aleipata, a o tagi masusu ma faamatala le galulolo. Na faamatala le tina ua fai atu foi isi ana fanau, e fau sona fale i uta e nofo ai, e sili atu pe nofo lava i le togavao ae mamao ese ma le sami ona e le toe fia manatua e le tina vaaiga o le taeao o le Aso Lua, 29 Setema 2009.
O niu paogo e lua ua tatau i ai manoa ma ‘afa ma faatutu ai nai laau maga ua faapulou i le tapoleni o loo mapu ai le tina o Afeane ma ua avea ma ona faleoo e lalaga ai lana ietoga.
O tua ane o loo iai nai faleie o si ana fanau o loo tau ina faamautu ai i lenei taimi a o faatalitali se fesoasoani mo le fausia o se maota fou.
“O se vaaiga matua faamomoiloto tele ia te au…. talu ai … o se taimi muamua lenei faatoa vaai ai lo ta olaga i sea mea faapea, ua vaai tino o ta mata i le fafati mai o le mea. Ia o au la ou te sau mai le matou fono tatalo i tai i Pu‘ē i le matou lotu Assembly i le taeao lea ou taunuu mai loa i lou aiga.
E lei umi lava ona ou taunuu mai poo faatoa tea le fitu poo le ono ea, ae faateia loa au i le lulu o le mafuie”, na faamatala ai le tina.
“Na ona na lulu a o le mafuie ou vaai atu i le ō, o au meafale ia matua tulaga ese i la ta tilotilo atu i ai, sa faapea loa ona ou valaau atu isi au fanau e o i fafo ma le fale, ae na ona ou pai atu i lau TV o la e tu, ou fai atu.
‘Faafetai le Atua ua e faaalia au galuega mamana a o ao, ae ana e sau nei i le po talofa i le ola ma le soifua o le a tele i le maumau, ia ma valaau atu lava si ou tuagane ia te au ou te momo’e matu ua oo mai le galu”.
“Sau a si ou tuagane ma si au tama ma toso mai ou lima ae ua oo mai a le galu. Matou taufetuli mai i uta i si aiga la lena ae matou vaai atu o sau a le galu i o matou vae. Uma loa lena ou faafetai i le Atua ua matou sao mai ai aua ua ou vaai atu ua alu le mea i tai. Ae matou toe faalogo atu ua toe feei mai fai mai e o i uta, o i uta ua toe sau, toe sau le matou tuli” o le faamatalaga a Afeane.
“O inei la na matou mapu muamua mai i ai, ae matou toe faalogo atu ua toe sau le valaau ua toe sau le galu matou toe taufetuli loa agai i uta i le mauga, matou taunuu i uta o le mauga ae po loa. Ia o le aualatele a, o le mea a na matou tau atu i ai matou nonofo ai loa iina. O le malulu ia o le po aua e leai ni mea na matou o ma matou.
O le fesoasoani muamua a na tau atu ia matou lena na maua ai nai ofu mafanafana ma solo ma ieafu ma maua ai loa le matou fesoasoani.
O le atoa o le lua aso na alu atu ai loa le logo matou te toe soso mai i tai ua saogalemu, ona ua mamao tele le mea ua matou o iai”.
E le na o le tina lea o aafia i ni lagona mafatia ona o vaaiga i le galulolo ma ana sauaga. O tagata uma na aafia soifua o o latou aiga faapea ma meatotino e faagalo gata lea mala faalenatura. O le lagona o le tina o Afeane e le toe fia foi i tai, o loo tau fai lagona uma e aiga, peitai e iai isi o loo manatu o se faaiuga e faigata ona faatino ona o vaaiga ma le soifuaga sa ola ma soifua ai, aemaise o fanua ma eleele o loo lagomau ai nisi o e pele i loto ma agaga.