Ua lē o toe fou i le faafofoga a le atunuu tuuaiga ua masua mai i fafo a le kapeteni o le Manu Samoa ma ua tali mai foi i ai le ofisa sili o le iuni lakapi a Samoa ma le sui taitaifono e pei ona teena uma ai ia tuuaiga.
O se avanoa na faatalanoa ai e se tasi o leitio i Apia le taitai malaga le afioga Tuala Mathew Vaea i le vaiaso talu ai, na molimauina ai le tutulu o le taitai malaga ma faia lana faatoesega i le atunuu, pe afai ua iai se aleu ma se lape i le faatinoga o ona tiute a o iai le aulakapi a Samoa i le Ipu o le lalolagi.
O le faatoesega lea a Tuala Matthew Vaea na ia faamalulu ai foi i le tapuaiga a Samoa aoao i le tulaga ua aliali mai, ina ua lē ausia e le Manu Samoa le tulaga maualuga sa naunau e oo i ai lana taumafaiga.
O le tutulu o le taitai malaga ua iai le talitonuga o le toatele, ua mafua ona e lē o nofonofo le kapeteni i le tali mai pea ma toe faamamafa mai le tumau o lona finauina o tuuaiga faasaga i le pulega o le iuni ma le ‘au, aemaise ua faailoa foi le lagolago a nisi o tama o le ‘au i le lipoti a le kapeteni ua tuuina atu i le taitaifono.
O loo faasolosolo pea i nisi o tusi mai nisi o tama o le ‘au, o nisi e agai sa‘o a latou tusi i le taitaifono o le iuni, a o nisi o loo tusi faamalosiau atu i le latou kapeteni, e matuā lagolago atili i le moni o mea uma ua folasia e le kapeteni, o ni faaletonu sa iai le pulega o le ‘au a o iai i taaloga mo le Ipu o le lalolagi.
Ua lagona foi i luga o faatalanoaga i alaleo eseese manatu faaalia o le mamalu o le atunuu i lenei lava mataupu talu ona tulai mai.
O loo mātele lava ina lagolago le mau, ua tatau ona suia atoa le pulega o le ‘au ma totonu o le iuni lakapi a le atunuu.
Aemaise lava pe a fua i le tele o molimau ma nisi o tama tuai o loo ta‘ua ai, e lē o se faafitauli fou lenei mea e pei ona lagā e le alii kapeteni, ae o se ma‘i ua leva ona iai, ma atonu o le laolao tonu lenei ua tatau ai loa ona faatino se suiga, ina ia agaigai i luma le lakapi a Samoa.