Tutulu le pagota i le fefe i leoleo ina ua toe sui lana molimau

Tusia: Merita Huch
Samoa

O le alii e suafa ia Siliva Suitupe, o se alii pagota sa i totonu o le potu na taofia ai se alii Samoa na malaga mai i Niu Sila ae maliu ai a o i le atunuu. O le maliu o lea alii o Hans Dalton na tele le mau faitioga ma fesili na lāgā mai ai ona o le tele o masalosaloga i le mafuaaga o lona maliu.
O Suitupe la sa faapea ona taofia i le potu na avatu i ai le alii lea ua maliu ae o le isi alii na o la toalua o Jonathan Patrick Crichton, lea ua molia i le fasioti tagata faamoemoeina ona o le maliu ai o Dalton.
O le po o le Kirisimasi o le tausaga e 2012 na taunuu atu ai Dalton i Tafaigata. O se alii na avatu ona ua lē mafai ona taofiofia mai i lona gasegase ua faamautu nei o le mafaufau. E pei o isi molimau a leoleo i lenei mataupu lea e faagasolo i luma o le Faamasinoga Maualuga, talu ona taunuu atu le alii lenei o Dalton, e lei malolo le pisapisao, na o le faufaue‘e, tagi ma tauvalaau, ma sa faaalia e Suitupe na iai foi i le taimi na agai atu ai le fomai i le po lea mo le faia o togafitiga o Dalton ina ia taumafai ai e faafilemu.
O lana molimau na ia ta‘ua ai o le vaveao o le aso 26 o Tesema na alu ai i le falelēta‘ua ae vaaia ai loa i fafo atu o le latou potu le alii o Dalton ua i totonu o le kalone vai sa i fafo o lea potu ma ua faapea ona aliali mai i fafo ona vae ae o loo tu ai le alii o Crichton i autafa o le kalone.
O le molimau lea na sui ina ua fesiligia lea alii e le Faamasino o loo fofogaina lenei mataupu le Afioga Lesatele Rapi Vaai. Na fesiligia e le alii Faamasino le itu lea e lua molimau tusitusia a lenei alii na faia. O le molimau tusitusia na faia i le tulai mai ai o le maliu o Dalton ia Tesema ma le isi molimau tusitusia na faapea ona faia mulimuli ane i le masina o Ianuari.
O le faasologa o fesili a le alii Faamasino ia Suitupe na te‘i ai lava ua vaaia le tutulu o le alii pagota ma ia faapea atu i le Faamasino o le molimau lea na ia folasia i luma o le faamasinoga sa faatonu o ia e Leoleo ina ia fai.
O le molimau tusitusia mulimuli lea na sau ai lana molimau lea ma na ia faaalia e fefe tele i le tulaga e oo i ai lona soifua ona o lea ua ia ta‘u i le faamasinoga faatonuga a Leoleo. Sa vave ona faatonu e le alii Faamasino le itu tagi ina ia mautinoa e saogalemu le alii pagota  mai le ono tulai mai ai o ni faaoogalima.
O loo teena e Crichton lenei moliaga ua faia faasaga ia te ia. O le moliaga e faapea o Crichton na ia lelemo Dalton i le kalone vai lea e i le poloka na taofia ai faatasi ma Hans Dalton i aso e pei ona faaalia. O loo faaauau i lenei vaiaso lenei faamasinoga.

Jonathan Patrick Crichton, ua molia i le fasioti tagata faamoemoeina ona o le maliu ai o Hans Dalton Siliva Suitupe le pagota lea ua sui lana faamatalaga ua faafefe e leoleo