E toalima poo le sili atu foi ni tagata faigaluega a le kamupani o le Digicel Samoa ua faamalolo mai a latou galuega ona o se vaega tupe ei le va o le 400 ma le 500 afe ua faaaogā sese i ni auala solitulafono.
O le sui Komesina o leoleo le afioga Afamasaga Michael Soonalole, na ia faailoa mai ina ua fesiligia e faapea o ia sa oo atu i ai le tagi a le kamupani ma faia ai loa suesuega a leoleo. “Na faatoai mai le mataupu ma le faamatalaga o ni tupe ua faaaogā sese”.
E lē o mafai ona gagana mai le pulega o le kamupani o le Digicel i le mataupu ona o le faamatalaga ua i lima o leoleo. O i latou ua faamalolo o ni tagata faigaluega i le vaega e vaaia tupe a le kamupani.
E lei faailoaina e le sui Komesina poo ua iai nisi ua molia ae o loo iai le talitonuga a mae‘a suesuega o loo faia ona iloa ai lea pe toafia o le a feagai ma ni moliaga faasolitulafono.
O le feiloaiga a tusitala ma le sui Komesina o leoleo na ia faailoa ai foi nisi o mataupu sa faatoai atu e pei o ni tagata na maliliu. O se tina 40 tausaga le matua na agai ma sana uo tama i se faletalimalo o le Tatiana i Fugalei e malolo ai, ae oso ai se gasegase faafuasei o le tina ma faanatinati atu ai i le falemai lea na maliu ai lava.
Faaalia e le sui komesina o le lipoti a le falemai ua faailoa atu ai o le tina na oso lona ma‘i sela, ma e lei manuia taumafaiga ma uma ai lava lona soifua. O le faamatalaga a le uo tama a le tina i leoleo e faapea na taunuu i le Tatiana Motel ona faia lea o le la taumafataga o le aoauli, ae faafuasei ona oso le gasegase o le tamaitai ma ave ai loa i le falemai lea na siliga taumafaiga o togafitiga ma maliu ai lava.
O le isi maliu na faailoa e leoleo o se taulealea na mafua i se faalavelave tau taavale. O se pikiapu na oso i le sami i le pioga tu o le alatele i Luatuanuu e lata i le tuaoi ma Solosolo na mafua ai. Na manunu‘a isi tagata e toafā na malaga ai i le taavale.
O se tasi o maliu o se tamaitiiti 10 tausaga le matua ona o se faalavelave foi tau taavale na tupu i Saleilua Falealili. O se taavale na tifa i tua o le auala oso atu i luma o le fale o se aiga o loo iai le tamaititi ma lavea ma uma ai lona ola.
Ua molia lē na faafoeina le taavale i le ave taavale faatamala ua mafua ai le maliu, ma le moliaga o le ave taavale a o tagofia le ‘ava malosi.
