O se tasi o tamalii sa avea ma Komesina o leoleo i tausaga ua mavae, o le uluai molimau lea na valaauina e faia sana folasaga i luma o le Komisi Suesue o loo silasila i le mataupu na aafia ai le alii Nigeria o William Okoro ina ua amata galuega a le Komisi Suesue i le vaiaso na tea nei.
Sa faataatia e lea tamalii le faataatiaga o tiutefai o leoleo pe a oo ina faia se suesuega i se solitulafono.
E lē o faatagaina e le komisi ona faalauiloa le suafa o lea tamalii seia vaganā suafa o nisi o leoleo o loo galulue i le taimi nei ua mae‘a tuuina atu a latou molimau e pei o se tasi o Komesina lagolago le susuga Leiataua Fata Aviga Salale.
O lana molimau i le Aso Faraile na tea nei sa ia folasia ai foi tulafono o loo taiala ai le faatinoga o le galuega a le Malu o le Malo.
O se tamaitai ofisa o le vaega o femalagaiga o loo i lalo o le pulega a le matagaluega a le Palemia ma le kapeneta sa faia foi lana molimau, sa faamatala ai le aso ma le masina faapea le tausaga na taunuu ai i le malae vaalele i Fagalii le alii Nigeria o William Okoro lea na malaga ai se alii leoleo e saili i Amerika Samoa ma toe faafoi mai e suesue e tusa ai o se tuuaiga faasolitulafono.
O le alii leoleo o Luatimu Samau a o galue i le vaega o loo mataituina faiga solitulafono faavaomalo le Transnational Crimes Unit sa malaga i Tutuila ma saili le alii Nigeria, ma la malaga mai ai i Samoa ma ua mae‘a foi ona tuuina atu le molimau a lea alii leoleo o loo umia le tulaga o se leoleo asiasi poo le Police Inspector.
Ua tolopo nei suesuega a le komisi i le aso 30 o le masina nei, lea o le faaauau ai ona valaauina molimau mai alii leoleo sa faia le suesuega o le alii Nigeria o William Okoro.
