E lē solomuli le Komesina o leoleo le susuga Egon Keil i lona tali mai i fesili e faatatau i faitioga faaasaga i leoleo ma nisi o a latou osofaiga poo raid na faia talu ai nei. O osofaiga nei sa faaaogā ai laau malosi e puipui ai le saogalemu o Malu o le Malo.
Peitai ua mapuna mai ai ma lagona faanoanoa ma faitioga ia i latou na faatutu i ai ia gaioiga. E mamafa lava faitioga nei i le auala na faatino ai ia osofaiga e pei o le tauave e leoleo o aupega a o fepuleafi mata o fanau iti, lea na faamatala e se tina na agai tonu i ai se tasi o osofaiga i lo latou fale, na fetagisi ma laue fanau i le fefefe i ia vaaiga.
O se tasi o faitioga na masua mai i se aiga i Faatoia na osofai e leoleo le nofoaga o loo faia ai se latou pisinisi o fale e nonofo totogi ai tulisi poo tagata tafafao mai fafo.
O le faamatalaga a se tamā o lea aiga le susuga Eti Sapolu ua faafā ona osofaia lo latou aiga ae leai ni maruana o maua e leoleo. O le faitioga foi ona e faapea e toafā ni tamaitai na sueni ai e leoleo lea e faapea na faatelenoa se‘i tulou a o sue o latou tino.
O le saunoaga a le Komesina o leoleo, o le faia o le tiute o Malu o le Malo e mafua ona tauave aupega poo laau malosi e mo le puipuiga o le filemu. E lē o umia foi e leoleo ia aupega i se auala e ta‘i ma faalala ai i se tagata.
Ua teena foi e Egon Keil i le faatelenoa o ni tamaitai a o faia sailiga. “O le mea muamua e lē mafai ona faia e leoleo ia ituaiga o gaioiga seia vaganā ua umia e leoleo le pepa faataga search warrant)”.
O le tasi lea o tuua‘iga ona e faapea na o atu leoleo e leai se pepa faataga, ae sa lē faamatalaina foi i le aiga le latou gaioiga o le a fai, lea na talepe ai e leoleo le loka o le faitotoa ae ulufale ma faia le latou galuega.
“E lē mafai ona matou faia se tulaga faapena se‘i vaganā ua iai se isi tulaga na aliali mai na mafua ai ona faia se gaioiga faapena”.
O le tasi lava o tuua‘iga malosi e pei ona faia ai se suesuega e le ofisa o le Komesina o Sulufaiga poo le Ombudsman office, o le osofaiga lea na sue ai se poloka faatau a se alii ma lona toalua i le maketi i Fugalei.
O le susuga Suitupe na faatutu i ai le osofaiga ona o se faamatalaga na oo i leoleo na ta‘ua ai le iai o se fuafuaga a lea tamā e osofai le minisita o leoleo i se tulaga e lamatia ai lona soifua. Peitai o lea ua maua ane ni molimau e lē sa‘o ia faamatalaga na oo i leoleo.
O faamatalaga faalilolilo poo intelligence informations na faaalia e se tasi o leoleo sinia, o se itu e tatau i le latou galuega ona sailiili lelei ina ia mautinoa e sa‘o ma talitonuina.
O le popolega o lea leoleo sinia ona e mafai lava e se tagata o loo lē fiafia i leoleo ona fafau ni faamatalaga e faafoliga e moni, ae o se gaioiga ua faia ina ia tuua‘ia ai le tiute o Malu o le Malo.
