E toatele ua silafia le alii pese Samoa lauiloa i ona foi vaitaimi i le taleni o le musika, le susuga Harry Miller. O loo faataotolia o ia i Aukilani mo togafitiga o le gasegase matautia o le kanesa. O le sauni atu ai o Samoa e faamanatu lona 52 tausaga o lona tutoatasi ua tuufaatasia ai nei nisi o faipese lauiloa o le atunuu ina ia saili fesoasoani mo lenei tamalii, o se auala ua ta‘ua e le tasi o i latou ua tuufaatasia se faafiafiaga tele mo Miller, Apulu Lance Polu, o se ‘auala lenei e faafetaia ma amanaia ai foi lenei tamalii o Samoa i lona sao i le atinae o le pese ma le faafiafia musika i le atunuu.’
O le aso 4 o le masina o Iuni i le mae‘a ai o le faagasologa o faamanatuga o le tutoatasi i lenei tausaga ua fuafua e faatino ai le koneseti lenei i le faletalimalo o le Manumea i Vailima.
O le amataga o le tausaga ia Ianuari le aso 27 na tulai mai ai se faalavelave a o auai atu Miller i se sauniga mo le faamanatu ai o le vaiaso o aoaoga a le ekalesia Katoliko i Amerika Samoa ma na matapogia ai lea tamalii i le taimi o le tatalaga o lea vaiaso faapitoa. O isi suesuega na ta‘ua ai e le gata ina aafia le susuga Harry Miller i le kanesa o le māmā ae faapea foi se tuma (tumor) i lona faiai.
Faaalia e le fetalaiga Apulu, o le taumafaiga lenei ua valaaulia ai soo se tagata pese, o se faaili atoa ai isi tagata faafiafia o Samoa ina ia tutu faatasi mo lenei faamoemoe ma o le seleni e aoina mai i lenei koneseti o le a tauaao atu i le aiga o lenei tamalii mo le feagai ai ma togafitiga o Miller.
O Harry Miller o se tasi o le aiga musika lenei ua tele tausaga o faafiafia i le latou lava faaili a o lei agai ane ma tuufaatasia i le faaili o le ‘Ava’ faatasi ai ma Faanānā Jerome Grey. Ua tele tausaga o faafiafia i le Faletalimalo o le Tusitala i Sogi. O ia o le ta kitara o le faaili lauiloa o le Ava e pei ona iai fatuga e pei o le We are Samoa, Naunau i le Ufi, Eleni, Morning Star ma le tele o isi fatuga.
Na faaauau lava lenei taleni e oo mai i le taimi na maua ai lona gasegase a o faamautu ai ma le faletua ia Monica Miller i Amerika Samoa lea na faavae mai ai le faaili lea a le Ava.
E tele tausaga o galue o ia o se faiaoga o le musika i le aoga maualuga a le Malisi i Faasaō ma o ia foi sa avea ma Faatonu o le Aufaipese o le Fatuoaiga a le Ekalesia Katoliko i Amerika Samoa.
O Harry Miller o se tasi o le auuso e toatolu o le faaili o le Willie Miller Brothers, lea e aofia ai foi ma Maua ma Latu Miller ma o le taimi lenei ua toatele i latou ua iai le manaoga e faafiafia i lenei koneseti ae o loo tatala pea le avanoa mo nisi e fia faaopoopo i le toatele ua avatu le lagolago i lenei faamoemoe.
O i latou ua faamautu i le taimi lenei le auai atu, o le fa’aili a le Ynot, Afa Laban ma lona alo tamaitai ia Simaima Laban, o le faaili o le Tama Uli, o Tony Lagan, o le faaili o le Silva Bullet, Willie Rasmussen, Lyle Moors, Pisi Stanley, Muliaga Mamaia, Dave Parker, Stock, Frank & Sopo, Shane Rivers, Ben Vai, Siaosi Tuiletufuga, Faamanatu Solomona, Lesa Ilalio, Toleafoa Solomona Toailoa, Teo Richard Tapeni, Jennifer Nylon, Francis Silva, Tolumaanave
Misiluki Su‘a.
