“O le malosi lava o le soona aai,” Palemia o Samoa
O se saunoaga malosi lea a le Alii Palemia, le susuga Tuilaepa Lupesoliai Sailele Malielegaoi ina ua tatala le fono faaletausaga ua faatautaia i le va o tausi soifua ma fomai mai i Amerika Samoa faapea ai Samoa.
O le auga lava lea o le tele o faama‘i lē pipisi i Samoa e pei ona ta‘ua e le taitai o le Malo, ona o le lē faautauta lava o le tagata i taumafa o loo tagofia aemaise o le suiga ua iai le soifua ua tau lē gaoioi ai le tino.
“E leai lava se isi mea e mafua ai le ma‘i o le malosi lava o le soona aai,” o lana saunoaga lea.
“O le tasi lava lenei faafitauli aupito maualuga i atumotu o le Pasefika aemaise lava i tagata o Samoa e lua, o le tino puta, ua pepesi ai faama‘i nei e mafua ona o le suiga o le soifuaga ua iai nei, ua maualuga, ua maua tupe ma ua mafai ai ona faatau taumafa lololo ma ulaula tapaa, inu o le pia ma meainu malosi ma isi lava suiga ona tulai mai ai loa lea o gasegase e pei o le kanesa o le māmā ma le kanesa o le ate e mafua mai i le ai kapaa ma le inu o meainu malosi, sosoo ai ma le toto maualuga, ma‘i fatu, o le ma‘i suka, ua suka uma le tino e mafua mai i le tele o le mealelei, o le ma‘i sela ma isi gasegase lea ua 60 pasene o tagata Samoa ua fasioti ai e ma‘i nei”.
Faaalia foi e le Taitai o le Malo, a tuufaatasi ma‘i uma nei ma le lē gaioioi o le tino ua matuā faigata tele loa le soifua o tagata Samoa.
“O le mea la lea ua fono ai sui nei o le Soifua maloloina mai i Samoa nei faapea foi sui o Amerika Samoa ina ia faataatitia ni fuafuaga ma ni polokalame e saga unai ai le soifua maloloina o o tatou tagata”.
Na fautuaina foi i latou i totonu o le auaunaga lenei faafomai ina ia amata mea mai latou ae lē o le solomua i fomai ma tausi soifua le tino puputa, ulaula tapaa ma le lē faamalosi tino.
Ua silia i le tolu tausaga e lei toe feiloai Taitai o Malo e lua e pei ona faamautu ai fonotaga e feoai ai lava taitai o Samoa ma Amerika Samoa ma faauluuluga o a latou matagaluega ma faalapotopotoga e soalaupule nisi o auala e mafai ai ona fesoasoani uma auaunaga a le motu i Sasa‘e ma Samoa nei i le faaleleia o le soifua manuia o tagata o le teritori ma Samoa nei.
“E ui lava la e lei toe feiloai itu e lua mo ni nai tausaga, ae ua mae‘a lava ona taatitia aulape poo fuafuaga auā le faaleleia o soo se auaunaga moomia i le va o motu e lua” o se finagalo lea o le Alii Palemia.
“O le faatinoga la lea a le Matagaluega o le Soifua Maloloina mo Malo e lua, ua leva na fetuunai ma le Malo o Tutuila poo le ā se auala e faatasi ai ma vaavaai poo ā ni mea e mafai ona galulue agai i ai,” o se saunoaga lea a Palanitina Tupumatagi Toelupe, le Ofisa Sili o le Matagaluega o le Soifua Maloloina i Samoa nei.
O le tausaga ua mavae na talimalo ai Tutuila i lea Fonotaga, ma o loo tuliloa le tali atu a Malo e lua i faavae o le tali mai i faatinoga a le Matagaluega o le Soifua Maloloina.
O le tausaga lenei o loo faaautū i faama’i o loo tulai mai ona o le suiga o le soifuaga ma o loo taumafai Samoa e taulamua i taualumaga o lea fono.
O lea taumafaiga e maua ai se fautuaga e faaopoopo i le fautuaina o le soifua maloloina mo le fono o le a auai atu i ai le afioga i le Palemia i le Fonotaga a le lalolagi. O loo faasoa tulaga o Polokalame fai mo atunuu e lua ma o loo galulue faatasi ai.
I Samoa lava ia ua mautu polokalame a nuu ma afioaga i faamalosi tino ua faamalosia i nisi o nuu atoa ai a‘oa‘oga mo le mautinoa e paleni ma soifua maloloina taumafa o loo maua i lea aso ma lea aso.
Ua faamalosia foi e tulafono le faasā ona toe ulaula se tasi i nofoaga faitele.
O polokalame uma nei ua agai i ai le faasoa a sui o le Matagaluega i Samoa nei ina ia vaaia ma unai foi i Amerika Samoa.
