Ia matua viia le Atua e ala i pesega, ma taleni pese ua foaaina mai. O le agaga lea sa faaautu i ai se polokalame sa tuufaatsia e le ekalesia a le Central Worship Centre, i aukilani.
O viiga i lona itu faatino i pesega ma Viiga, ae faapea foi ma auai ma viivii faatasi o lana fanau, o itu taua uma ia sa mafua ai se tuufatasiga sa faia i le afiafi o le Aso Faraile, na tea nei.
O se polokalame sa molimauina le toatele o aufaipese, faapea Taitai pese mai ekalesia poo Tino eseese o le galuega a le Atua. O le ekalesia a le susuga i le Faafeagaiga Pastor Fesalaiai Paeu Meke Leilua, ma le faletua ia Faafetai Dora Leilua, sa aumaia le agaga ma le fatu o lea sauniga tāua.
Sa matagofie le gasologa o lea po, ona o le toatele o nisi o aufaipese sa auai ane mo le faamoemoe. O le team, poo le au a le ekalesia Central Worship Centre, sa taitai i le saunia o viiga, ae sa tofu lava au taitasi sa valaauia ma o latou sao e tusa ai ma le faatulagaina o le polokalame.
O le tamaitai fatu pese lauiloa a Niu Sila i lenei foi vaitau, e le gata i le matagofie o lona siufofoga, a o le mālie foi o ana fatuga ma le tusiga o ana lana pese, Hana-Maria Leilua, poo Ria Leilua e pei ona silafia ai i luga o televise ma leitio, sa avea ma taitai pese (worship leader, lead singer) i lea afiafi.
Sa avea ma auala o le tosina ane ma le fia auai o le toatele o tupulaga talavou, i le molimauina ma le fia vaaitino i lea foi alo tautaua o le atunuu i luga o le maketi o pese i lenei vaitaimi.
O Ria o le alo o le susuga i le Faafeagaiga, Pastor Fesalaiai ma Tai Leilua, o le ekalesia lava a le Central Worship Centre.
O au pepese ma ausiva mai ekalesia AOG i Aukilani, Avondale, Epsom, Papatoetoe, o le aufaipese a le Kingdomised Church, ausiva mai Magele, faapea nisi o au mai isi vaega o Aukilani, e silia ma le sefulu sa auai uma.
O se itu tāua tele sa vaaia ma faamaonia i lea tuufaatasiga, ona o aga fesootai ma agavaa faasoasoa ma fetufaaiga e le gata i le Au-Faigaluega a le Atua, ae faapea foi ia i latou o iai taleni o musika ma pese, o loo faaaogāina ai o latou soifua i totonu o ekalesia taitasi, ma le valaau a le Atua.
O le tapuai faatasi, i le loto e tasi ma le agaga e tasi, ina ua fusia i le loto maualalo ma le loto faamagalo, o se taiala manino lea e taitaiina ai le tagata i le mamalu o le Atua, ma afio ifo ai le Agaga Paia e faamanuia i soo se tagata tapuai ia te ia i le agaga ma le faamaoni.
O nisi o molimau tāua o lea afiafi sa tautino ai nisi o Taitai pese ma Auauna a le Atua, sa faamamafaina ai le lē afaina, poo le ā le ituaiga tagata o iai, maualuga pe maualalo, poto pe faavalevalea, mauoa poo le mativa, tupu pe lē taualoa, lelei le leo ma poto e pese ma siva faaleagaga, ae o le lotomamā, ma le tapuai i le agaga ma le faamaoni, o le tagata lea e manao ma finagalo i ai le Atua.
Ia aua ne‘i faia ma le faalialiavale ma le mimitavale ona o taleni ma agavaa ua maua, ae ia faia ma le agaga maualalo, ina ia viia ai le Tamā, o lē ona meaalofa, ma tautua ai le ekalesia o loo galue ma auauna ai.
Saunoa Pastor Fesalaiai Leilua, o le galulue soofaatasi o se fuafuaga ua leva ona tatau ona faia, ma e tatau lava ona faataunuuina pea lava, ona o le finagalo moni lea o le Atua na valaauina le tagata.
Ua le tatau ona toe maua ni maseiga ma le femateai i le galuega a le Atua, peitai ia galulue faatasi ma auauna faatasi e tāua tele lea.
O le mae‘a ai o le sauniga ma pesega faatino e pei ona faapolokalameina, ona alo lea o le mamalu ma le auvaalaulia i le iputi ma le taumafataga sa tapeina e le ekalesia Central Worship Centre, ma nisi sa fesoasoani i lea tulaga.
Sa matuā faatumulia le nofoaga i Mt Roskill Memorial Hall, i Mt Roskill lava, i le paia ma le mamalu o i latou sa auai, aemaise lava o ekalesia ma a latou aufaipese sa tapenaina Viiga, e pei ona sa faaautu ma taulai i ai le agaga o lea afiafi.
