O le tusi faamavae a le afioga i le Laau na Fausia, Misa Telefoni, na momoli i Faaaloaloga a le Aiga Taua‘ana, o loo faamatalatala ai e le sui faipule o Falelatai ma Samatau nisi o fenumiaiga i manatu ma lagona o tagata o lona itumalo, lea sa tuuaia ai lona maua o ni faamanuiaga mai le ata televise o le Survivor sa pueina i Fagaofu i Falelatai.
Ua faamatala ai foi e le Sui Palemia le faaono taofia o le atinae o se faletalimalo o loo fuafua e fausia i le nofoaga na pueina ai le ata televise, ona o loo lagomia ni finagalo i le eleele ua faatau motu e le afioga Asi Galumalemana Dave Haleck.
O lea fanua o se eleele umia saoloto e pei ona faaalia e Misa i lana tusi ma ua 112 tausaga talu ona faatauina ma umia e se tagata Siamani.
Silasila ma faitau i le tusi a le afioga Misa Telefoni:
OFFICE OF THE DEPUTY PRIME MINISTER
17 Setema 2010
Afioga i Faaaloaloga
Falefitu o le Aiga Taua‘ana
FALELATAI
E muamua lava le faafetai ma le faamanu i le Atua aua ou te talitonu o loo tumau pea le aoina o le masina i lo tou soifua laulelei. E momoli atu foi le faafetai tele ona o la tou tapuaiga i tiute ma galuega o loo feagai ma la outou auauna faipule.
E lagona le matamuli ona e le feagai lou tagata ma a outou afioga i faaaloaloga, peitai ona ua saunoa mai le faaaloaloga o le matou aiga, Afioga Misa Paepaetele, i se mataupu taua, o lenei ua ou tusi atu ai i lena mataupu ma nisi mataupu e fia fetufaa‘i atu ai ma tapa se finagalo o a outou afioga.
SURVIVOR SAMOA
E pei ona outou silafia sa ou lagolagoina tele lenei faamoemoe ona o le tele o faamanuiaga mo Samoa aemaise le tatou Itu Malo, e maua mai ona o le pu‘eina ma le faalauiloaina atu i le lalolagi atoa o lenei polokalame “Survivor Samoa”. O Faamanuiaga na tatou maua mai i le faamoemoe o le Survivor Samoa e le gata i avanoa i galuega mo le Itu Malo, ae faapea se auala fou e faataina lelei semanu e le aofia i le faasoa a le Malo pe ana le seanoa le mana‘o o le Survivor USA, ae ua faaleleiina ai foi ma le eletise agai atu i tai i le nofoaga sa faatinoina ai le pu‘eina o ata o le Survivor Samoa.
Ona o nei fuafuaga uma sa tele ni matou feiloaiga ma afioga i faaaloaloga i lena foi taimi, ma sa faamalamalama uma lava vaega eseese o lenei mataupu, aemaise le tulaga o le aveina o fanua mo le auala ma le tuuina atu o taui pe a mautinoa le pulega o nei fanua.
Sa faalele ni faamatalaga le faavaea, ma ua maea faasa‘o i se faamaoniga mai le Pulega o le Polokalame, e matua leai ni faamanuiaga a le faipule na maua mai lenei polokalame, ou te talitonu o se mitamitaga mo tatou uma ona o lenei polokalame sa faalauiloaina atu ai ia Samoa aemaise foi le lalolagi atoa le matagofie o si o tatou Itu Malo.
FALETALIMALO – “SURVIVOR RESORT” – ASI GALUMALEMANA DAVE HALECK – FAGAIOFU
O le Afioga Asi Galumalemana Dave Haleck, ua umia nei se suafa matai i totonu o le tatou Itu Malo. O lona faletua o se alo e faasino i le Aiga Sa Lealaitagomoa i totonu o Siufaga.
Sa faatau e le Afioga Asi Galumalemana le fanua tu‘usa‘oloto (freehold) i Fagaiofu mai le Afioga Lilomaiava Mike Kneubuhl. O lenei fanua (freehold) ua silia i le 112 tausaga talu ona umia fa‘a-fanua sa‘oloto, (mai le 1898), ma sa umia ai o se fanua totino o latou sa resitaraina latou te umia. O le Afioga Lilomaiava Mike Kneubuhl na ia maua mai lenei fanua i le uili a lona tuaa (tina) o Atalina Pritchard Kneubuhl. E leai ni faalavelave o faamauina i lena taimi atoa a o umia saoloto lenei fanua, seia oo mai lava i le taimi ua faatauina ai e le Afioga Asi Galumalemana Dave Haleck.
E leai foi se vaega e tasi o lenei fanua sa galueaina e le tatou Itu Malo i le taimi o le asiasiga a le Afioga Asi Galumalemana a o le‘i faamaea le sainiga o Pepa (Deeds) e faatauina ai lenei fanua. O le ulua‘i taimi foi lenei ua tula‘i mai ai se na te umia le fanua, ma na te fia faia ai foi se atina‘e tele. O le faamoemoe o se faletalimalo tele e ona maua ai ni avanoa faigaluega e sili atu ma le 250 mo le tatou Itu Malo. O lenei atina‘e e faamoemoe e silia ma le ST$25 miliona lona tau aofa‘i. Ua amata lava i le taimi nei ona maua avanoa faigaluega, aemaise foi pe a amata le fausiaina o le Faletalimalo i le amataga o le 2011.
Ona e na o le tasi le ata (plan) o lenei atinae o loo ia te a‘u, ua maea tuuina atu le isi ata i le Kapeneta, o le a tuuina atu le ata lenei mo lo outou silafia i le Afioga Faaaloaloga Lupematasila Sealiitu. O le a faasoaina atu nisi ata i le lumanai pe a ou mauaina.
O nisi nei o faamanuiaga mo le tatou Itu Malo e maua pe a faatinoina lenei atina‘e:
• maua ai avanoa faigaluega mo le mamalu o le itu malo i vaega o le tausi fale (housekeepers), tausi lotoā (groundsmen), au faafiafia, au kuka, au “serve”, au tali telefoni (receptionists), ma soo se avanoa lava e talafeagai. Ua finagalo malie Afioga Asi Galumalemana e tuuina muamua lava soo se avanoa mo ni galuega i le mamalu o le tatou itumalo.
• O le a toe faaleleia atili ai foi e le Malo le Eletise, Vai, Auala ma nisi atinae tetele. E moni e mo le faletalimalo ae o le a manuia ai ma le Itu Malo atoa i vaega uma nei o le a toe faateleina ma le faaleleia atili.
• Maua ai foi maketi mo faaeleeleaga eseese e pei o fualaau aina (fruits and vegetables), faapea foi figota o le sami, ma aano o manu fasi.
• Tele foi nisi o faamanuiaga mo malo o le faletalimalo e ono faaaoga ai pasi la‘u pasese, faapea foi taavale laiti (taxis) pe afai e manaomia. O le faamoemoe e ave uma ni avanoa faapenei i le au fai pisinisi i totonu o le tatou Itu Malo.
• Ua maua foi se faamaoniga mai le loia o latou e umia le fanua i Fagalei, o loo iai foi se latou faamoemoe mo le fausiaina o se faletalimalo tele, peitai o loo nofo vaavaai pe saogalemu ma manuia le faamoemoe a le Afioga Asi Galumalemana.
E pei ona taua i luga, o nisi nei o mafuaaga ou te lagolagoina malosi ai lenei faamoemoe.
Ina ua fesiligia e nisi le tulaga sa‘o o tuaoi i le 2009, sa ou ofoina atu foi se fesoasoani e toe fuaina ai lenei fanua ina ia faamaonia ai tuaoi tonu pe afai e toe manaomia lena fesoasoani. Peitai, ua ou maua se faamatalaga sa faia iai se suesuega a le Loia Sili a le Malo i le faatonuga a le Afioga Alii Palemia, ma ua faamaonia uma tulaga manaomia o le umia saoloto o lenei fanua e le Afioga Asi Galumalemana Dave Haleck. O lenei faamaoniga sa molimauina e tou afioga i se tou feiloaiga aloaia ma le Afioga Alii Palemia.
I le taimi lenei ua tau faaletonu le tofa a le Afioga Asi Galumalemana pe tatau ona faaauau le fausiaina o lenei faletalimalo pe leai. E mafua ona ua masalomia pe lagolagoina e le tatou Itu Malo le faavaeina o se atinae tele faapenei i totonu o Falelatai. E le aoaia e Laupua Tamafaiga, tau ina ou valuvalusia aa o le fau i sa outou finagalo faatamalii. e le mo tatou ae mo le lumanai o tupulaga lalovaoa o si o tatou nuu ma le Itu Malo o fai mai. E le au maua foi nisi e mafai ona latou umia lenei fanua ma toe mafai foi ona faatuina ma faatupeina se atinae tele faapenei e pei o le Afioga Asi Galumalemana ma lona aiga.
ATINA‘E TOTONU O LE ITU MALO
Ua maea ona tuuina atu ni a‘u tusi e tusa ai o nei faamoemoe sa manaomia i totonu o le tatou Itu Malo, e aofia ai auala, faleaoga, aoga faata‘ita‘i, malae ta‘alo, suavai, auala galue ma le tele o nisi galuega sa fuafuaina. O le tele o nei atinae ua maea, peitai o loo faagasolo pea nisi o galuega i le taimi nei. O le a ou nofo uta e toe so’ona unaia le malo ina ia faatino loa nei galuega o totoe i le lumanai e pei ona fuafuaina.
TOFI FAIPULE A LE ITU MALO
E lagona lava le faagaeetia ona o le avanoa sa tuuina mai i lo‘u nei tagata faatauva‘a ou te tautuaina ai le tatou Itu Malo e ala i le tofiga o le Faipule i le Palemene a le Malo Samoa. Momoli atu foi la‘u faafetai tele, ona o le afioga tutasi o le Falefitu o le Aiga Tauaana sa ou tulai ai e tauva i faigapalota talu mai le 1988. O le usitaia lava o le afioga tutasi sa mafua ai ona ou tauva, i faigapalota uma mai le 1988 i le 2006. O le 2011, e atoa iai le 23 tausaga talu ona ou tautua i le tofiga o le faipule mo le Itu Malo, e atoa ai foi ma le 20 tausaga o le auaunaga i tofiga eseese o le Minisita o le Kapeneta (aofia ai le 10 tausaga i le tofiga Sui Palemia). O lenei auaunaga sa mafai lava ona o le pule sa outou toina mai mo a‘u. I le taimi atoa, sa taumafai lava e faatino le tautua i le tulaga sili e gata ai lo’u malosi aua se manuia o le Malo, atunuu, Itu Malo faapea Ekalesia.
Avea ai lenei avanoa e momoli atu ai malu i puega i a outou Afioga. Afai foi ua tou maitau mai ua le tau tamalii ma le atoatoa sa’u tautua i lo tatou Itu Malo, ia malu ave i fale o outou finagalo ae faamagalo lo‘u nei tagata. E poto lava le tautai ae sese lana atu i ama.
Ou te talitonu ua lava ma totoe la outou faaeaea i lo‘u nei tagata faatauvaa i nei tausaga e tele ua mavae. Ua toatele foi nisi sui ua afu la latou tautua i le tatou Itu malo, ma ou te manatu ua agavaa ma alagatatau ona faasoa atu iai lenei tofiga taua e tautua ai Samoa aemaise le Itu Malo. Ou te tumau pea i lo‘u lagolagoina malosi o la‘u vaega faaupufai o le HRPP, ona ou te talitonu ua tatou molimauina le tele o galuega lelei ua faia e le HRPP mo Samoa, aemaise foi le tatou Itu Malo. E lagona le faagaeetia o lo‘u nei tagata pe a faaauau i le lumanai le faigapaaga lenei a le tatou Itu Malo ma le HRPP. O le tatalo, ia alofagia e le Atua a outou Afioga i Faaaloaloga, aemaise le tatou Itu Malo atoa, le mamalu o le Aiga Tauaana ma le latou Tama, Fasavalu, Salu, Auvaaipeau ma Tama Tausala. Tainane foi Galuefa ia Falelatai, Tula o Salogo, Tagata o le Vavau ma Vae o le Nofoafia. Aemaise foi Fiame ma le Tamaitai, Falefa o le Usoalii ma le Gafa, ma upu ia te oe Leulumoega.
Ia utu pupuina pea e le Agaga Paia o le Atua la outou tofa faatamalii e saili ai se tasi e agavaa mo le tauaveina o le tofi faipule mo si o tatou Itu Malo.
Alofagia foi le tapuaiga a le Aufaigaluega a le Atua ma o latou faletua, o loo feagai ma le tauasuina o le ipu vai o le ola i fata faitaulaga e fia i totonu o si o tatou Itu Malo. Ia maua pea le mau mai le Atua aemaise le soifua laulelei a‘o feagai ai ma le talaiina o lona finagalo.
Ma le faaaloalo tele
Misa Telefoni
FAIPULE – ITU MALO FALELATAI MA SAMATAU
SUI PALEMIA