O se aso matagofie tele, le Aso Toonai ma le Aso Sa 7 & 8 o Iulai i le amata mai i taaloga sa alo atu i ai le tupulaga o le Matagaluega i Ueligitone (Petone, Porirua ma Newtown).
Na mae‘a taaloga i le taeao o le Aso Toonai, faasolo atu i le po fiafia o pese ma siva faaleaganuu na faatinoina, ma sa matuā matagofie le alo atu o le fanau ia latou tapenaga. Sa faatumulia ai le maota o le PIC i Porirua i le ‘aumaimoa mai le matagaluega ma isi malo mai isi aulotu i totonu lava o le Laumua.
O faaevagelia matagofe na momoli mai ai le feau faatalalelei i le Aso Sa ma sa faapea foi ona toe malaga mai le mamalu o mātua ma malo mai le vaiaai e maimoaina lea faasoa mai a le tupulaga i le gagana Samoa.
Ua vaaia lava ma le fiafia le tautatala mai o le fanau ia latou faasoa aemaise lava le laugaina o le finagalo o le Atua e le tamaitai o Rosalia Talo mai le tupulaga a Porirua. O tatalo foi sa feagai ma sui mai Petone ma Newtown na faapea lava ona faia i le gagana Samoa, ma le faitauina foi o le Tusi Paia sa faatino uma i le gagana Samoa.
O le faafoeina o aso e lua o le mafutaga sa faia lava i le gagana Samoa, ma o se fiafiaga lea i le matauina o le taumafai o nai alo na soifua mai i Niu Sila, ua tuu i ai lo latou agaga atoa e faaaogā le gagana Samoa.
E momoli atu ai le faafetai tele mai le nusipepa i nei suiga matagofie ua vaaia i le taumafai o nai tupulaga, ona o le galulue faamalolosi o le ‘aufaigaluega a le Atua faapea mātua i le faasinoga o le gagana i le fanau.
