O le tupu ma ola o se faamoemoe i le soifuaga nei, o se faailoga vaaia lea o le mauaa, ma le malosi, atoa ai ma le mautu o lona amataga ma le faavae.
O le agai i luma, ma lagolagoina e le toatele, atoa ai ma le maopoopo faatasi ai ma le fua mai o ni fua aogā, o faailoga ma ata vaaia ia o le galuega soofaatasi ma le faamoemoe i le Atua e manuia ai lavasiga ma fuafuaaga o le olaga nei.
O le Servolution, o se polokalame sa amata i se vavae mumū ititi, i lona tau amataina ma lona fanau mai pe tusa ma le lima tausaga talu ai.
Sa amata mai i totonu o se faalapotopotoga o tagata toagaogao, faatasi ai ma le lagolagoina e le ekalesia e tasi i totonu o Aukilani i Saute.
Peitai o le taimi nei, ua tupu ma ola, ma ua mafalā foi ona lālā, ma ua lē mafai ona faaitiitia le sosolo atu pea o ona aa, ma ua totogo a‘e ai nisi o moemoe, ma tatupu fou, i le tulaga o le fia auai, ma saga tapueina lea faamoemoe tāua.
O le Servolution, o lana mau tauave ma lona faamoemoe autū, o le ofoina atu lea o le tele o galuega lelei, galuega toe teuteu, galuega o le toe faamamā, o galuega fesootai, atoa ai ma le galuega fesoasoani, mo soo se tasi, soo se aiga, faalapotopotoga, ekalesia e oo lava i nofoaga faitele i luga o auala tetele, totonu o taulaga faatau, aai ma faoaaai, ma isi nofoaga.
O le tele o isi galuega o loo taulai i ai le silasila ma le faamoemoe o le Servolution, o galuega e lē o fia tagofia, ma vaai maualalo i ai, atoa ai ma le lē fia faaeleelea ai o le toatele o tagata o le soifuaga nei.
O galuega e ofo fuaina e lē tauia e lē totogia foi, ae faia i le agaga alofa, ma le manaoga ia maua le finagalo feoeoeai, ma le fesoasoani ae maua ai se viiga o le Atua. Sa amata lea foi galuega e pei ona ta‘ua muamua, i se pitonuu e tasi, ona agai ai lava lea ma faasolosolo ina ausia ma oo atu i nisi o aai i Aukilani lava ia, i lona itu i Saute.
O le tausaga nei, ua fuafua ai ma faamoemoe le Servolution, o le a savalia ai ma agai i le lautele o Aukilani, e pei o Aukilani Tutotonu, ma Sisifo foi. Ua manaomia, ma ua ola le fatu sa totoina, ua salalau foi le talalelei ma le tāua o lea galuega ma lona faatinoina atoa ma lana mau tauave.
O le ala lea ua tuu ane ai ma le lagolago a nisi o Faafeagaiga ma aulotu Kerisiano i isi vaega o le aai, ma ua manaomia le auai ma le talia lelei o le faamoemoe o lenei galuega tele e pei ona faataoto mai ai i lona amataga.
Ua faamaonia foi ua lē gata i Niu Sila, ae ua faapea foi ona aapa mai, ina ua oo atu le manogi ma le nanamu i Ausetalia. Ua amata nei i Ausetalia ona galueaina, ma suotosina agaga ma finagalo o fanau a le Atua i totonu o ekalesia eseese, mo le faaauauina o lea molimau tāua mo ona tagata.
O le susuga ia Pastor Lui Ponifasio, ma le faletua ia Ane, o le faafeagaiga o le ekalesia o le LifeChurch i Manurewa, o i laua ia sa uluai maua lea faaaliga tāua, ma amata ai loa ona faatinoina i totonu lava o le la galuega o loo galulue ai seia oo mai lava i le taimi nei.
O le saunoaga a le susuga ia Pastor Lui, sa ia faamaonia ai le tulaga manuia ma le maualuga ua ausia ma oo i ai le Servolution i lenei vaitaimi. Sa ia faamaonia foi, e moni lava sa amata i se faalapotopotoga itiiti, peitai ua saunia e le Atua lea polokalame, ina ia fesootai ai auauna ma le aufaigaluega, ma fanau a le Atua mai le tele o Ekalesia ma aulotu.
O lona finagalo ua ogatusa, ma ua ioeina foi e le toatele o susuga i taitai ma faafeagaiga, ua mafua ai ona faateleina pea, ma tupu le fia galulue faatasi e ala lava i le faamoemoe o le Servolution.
O nisi nei o saunoaga ma molimau tuufaatasi a susuga i faafeagaiga o loo taitai ma taiulu i vaega eseese i totonu o Aukilani.
E tatau ona o faatasi le galuega folafola i totonu o malumalu, ma galuega faatino i fafo ma nisi o nofoaga, ina ia molimauina ai le mea moni ma le alofa faatino o loo laugaina i le pulelaa, ma a‘oa‘oina ai tagata lotu.
O galuega faatino a le Servolution e pei ona faia, o loo momoli ma afifi ai se feau sili ona taua, a o se auala foi e fesoasoani i le galuega tala‘i, ma ia ogatusa ma le soifuaga faatuatua ma le malo o le Atua.
E tatau ona soifua tagata talitonu i le Atua, i se soifuaga mamā, ma se siosiomaga maloloina lelei. Ia o faatasi le fiafia e laei mamā, ma le faamamāina foi o fanua ma lona siosiomaga masani.
E tatau foi ona maua e tagata uma i totonu o lotu, ma isi nofoaga ma faalapototoga, le mafutaga soofaatasi ma le galulue faatasi, e ala i le silafia lelei ma fesootai i finagalo ma galuega faatino.
Ia amanaia aiā tatau ma tulaga uma o loo soifua ma ola ai le toatele i fafo atu o le lio masani i aso uma ma taimi uma. Ia maua foi le malamalama o le tasi i le isi, auā o le a mafai ai ona fealofani ma faatumauina le agaga tapuai faatasi ma vivii i le Atua.
O ata manino ia o le finagalo ma le malo o le Atua, aemaise ai o le soifuaga o le Kerisiano e tatau ona vaaia a o iai i le lalolagi nei.
O le a atagia ai le galuega fesoasoani na saunia e le alii Faaola ma lana Faaolataga.
O isi ia o mafuaaga tāua lava ua faamaonia ma fai ma molimau o lenei galuega ma lona faamoemoe, e pei ona saunoa i ai faifeau ma taitai o lotu. O lea lava mau sa ta‘ua foi i le faatalanoaga ma le susuga ia Ps Lui Ponifasio.
E ui ina ua tino mai galuega ma ua faataunuuina nisi o manaoga o le Servolution talu mai ni tausaga ua mavae, peitai e lē faamutaina ma lē nofoa‘i ai, ae o le a taumafai pea ina ia tulituliloa nisi o mau tauave ma ia oo lava lea talalelei i soo se tasi e manaomia, ma fia faaaogāina.
Ua savalia nei le 45 o aulotu i Aukilani lava ia ua tuufaatasia ma auai i lea lava faamoemoe. Ua 20 aulotu ma ekalesia i Ausetalia ua faapea foi ona auai ma soofaatasi i totonu o le Servolution.
O le faamoemoe lava e tasi ma lona sini autū e pei ona galulue faatasi ai, e ui ina eseese atunuu, peitai o loo auga ma taulai i le sini e pei ona totoina i Niu Sila.
O le susuga ia Pastor Derek Jones o loo faamaopoopoina le itu i Sisifo o Aukilani. O le susuga ia Pastor Peter Leota mo le aai o Magele, o Pastor Paul Gibson mo Otara, ma le susuga ia Opeta Tautalafua, o loo tuufaatasia Sydney i Ausetalia.
O le aso 14 e oo atu i le aso 19 o le masina nei lava o le a amata faagasolo ai galuega a le Servolution mo Aukilani atoa i Saute, Aukilani Tutotonu ma Aukilani i Sisifo.
O le a mafai foi ona maua nisi o faamatalaga ma molimau o le galuega faalaulelei o lenei tausaga, pe a mae‘a ma faataunuuina fuafuaga a le komiti ma le au galulue e pei ona tapena ma alo atu i ai.
