Ua tini le uto e pei o le faiva i vai ina ua ogatasi le futia ma le umele. Ua lua Ekalesia faaopoopo a le Matagaluega EFKS na tatalaina le isi i le Aso Sa 17 o Fepuari lea ua tausia e le susuga i le A‘oa‘o iu mai Malua, Susuga Iuma Ah Poe ma le faletua ia Ulalemamae i le Gold Coast o ni lupe faalele mai Leulumoega & Vaovai Falealili. (Tuatusi o le lotu: 34 Price Street Nerang). Sa lagolagoina ma molimauina e le Matagaluega atoa lea foi galuega fou i lona tatalaina aloaia.
O le Ekalesia Metropolitan West sa faatuina i Riverview i le Aso Toonai 23 o Fepuari, ua faafoeina nei e le susuga i le A‘oa‘o ia Asora Faresa ma le faletua ia Nuuausala (Fusi Saoluafata, Falevao). Sa faavaeina e le Komiti Faatonu, Rev Kerita Reupena FT.
O le faitauina o le Tusi Paia sa fofogaina e le susuga ia Rev Makisua Reupena FS. O talosaga sa molia e le susuga ia Rev Aofaiga Levi FS ma le lauga sa tapenaina e le susuga ia Rev Milo Faaleava FS.
Ua atoa ai nei le 27 Ekalesia o le Matagaluega EFKS a Kuiniselani. E tolu Pulega, o le susuga i le Toeaina Faatonu i le Pulega a Sisifo, Rev Kerita ma le faletua ia Binary Reupena.
O le susuga i le toeaina ia Rev Tauaaga ma le faletua ia Senerita Mataafa i le Pulega a Saute, ma le pulega a Matu lea o loo tausia e le susuga i le toeaina ia Rev Lauie ma le faletua ia Autalaga Lupematasila.
O le aao tusitusi o le matagaluega o le susuga ia Rev Milo Faaleava, ma le teu oloa ole susuga ia Rev Ionatana Faaiuaso.
