O le lipoti a le Komisi o le toe fuataiina o tulafono a le atunuu, Samoa Law Reform lea na faalauiloa i le tausaga na te’a nei, na faailoa ai o se tasi o mataupu ua aga’i atu i le Faamasinoga o Fanua ma Suafa mo se faaiuga, o le talosagaina o le aveese o se suafa Sa’o o se aiga mai i le Sa’o na o latou filifilia.

O se tasi o mafuaaga o lo o faalia ile lipoti, ona o le le lelei ona faasoa e le sa’o o le aiga o tupe maua mai i le lisi o pou o fesootaiga mai i le Digicel ma le Bluesky i le aiga potopoto. Faimai le tuuaiga, o loo faasoa e le Sa’o na o lana fanau ae misi atoa ai le aiga potopoto.

O se tasi foi lea o mafuaaga e tumutumu ai le Faamasinoga o Fanua ma Suafa i Mulinuu. O lea lipoti o lo o taoto mo se faaiuga a le kapeneta. Ua faamauina i faamaumauga a le matagaluega o Siosiomaga ma Punaoa Faalenatura le faitau aofa’i o aiga potopoto ua lisi atu o latou fanua mo pisinisi aemaise lava i pou a le Bluesky ma le Digicel.

O le aofai lava ia o fanua a aiga o loo lisi atu i le kamupani telefoni a le Bluesky i le 2018 – 2017 e   47 mo aiga – Upolu. E $156,861.62 le tupe fa’aalu a le kamupani telefoni, lea foi o lo o valoia e le kamupani o le aofaiga foi lena e totogi e le kamupani i le tausaga 2019.

O lo o faalia foi i faamaumauga e silia i le $5000.00 tala le tupe maualuga a le aiga i le masina, ma e le’o tamau ai, ona e fai ma toe iloilo. O le 20 tausaga le umi o lisi o loo fai ai i nisi o aiga. O Savaii e lata i le $100,000 tala le aofaiga o tupe faaalu a le kamupani a le Bluesky e totogi ai aiga o lo o lisi ane se vaega o latou fanua Samoa e faatu ai pou a le kamupani.

O lona uiga e ova i le 200,000 tala tupe faaalu a le kamupani i le tausaga mo aiga o lo o faaoga o latou fanua. O le kamupani telefoni a le Digicel, e $40,439.59 tupe faaalu e totogi ai aiga e ana fanua faaleaganuu mo Upolu e faatu ai latou pou o fesootaiga. Mo Savaii lava ia e $53,592.25 mo aiga o lo o faaoga e le Digicel o latou fanua faaleaganuu. O le aofaiga o Upolu ma Savaii e $94,029.84

O se tasi lea o vaega o le mataupu o lo o vevesi ai nei faanua faaleaganuu e pei ona iai le finauga a le SSIG faasaga i le malo. O le talitonuga a le SSIG, o lo o nana mai i tua i faaupuga suamalie le agaga tonu o le tulafono o le 2008, le faaaoga o fanua Samoa, e mokesi ai ni nonoga tupe a kamupani ma pisinisi mai fafo. O le talitonuga a le SSIG, afai ai sao le tulafono lea o lona uiga e i’u ina aveese ma leiloloa atu ai fanua faaleaganuu a Samoa.

O le vaiaso nei lea na uluai valaau ai i luma o le faamasinoga le mataupu o lo o tagi ai le vaega a le Samoa Solidarity International Global po o o le SSIG lea na tolopo mai i le vaiaso ua mavae. O le tagi a le SSIG faasaga i le malo, na faatulaga e fofoga i le aso 22 o le masina lenei peitai ua tolopo i le aso 29 e pei ona toe faatulaga e le ofisa o faamasinoga.

O le tagi o loo faasaga i le taitai o le atunuu, Tuilaepa Lupesoliai Sailele Malielegaoi, loia sili o le malo, Lemalu Herman Retzlaff, o le sa avea muamua ma loia sili a le malo, Aumuma Ming Leung Wai, o le matagaluega o Siosiomaga ma Punaoa, ma le Faalapotopotoga o Fanua a le malo, le Samoa Land Corporation.

Faimai le talosaga, ia faia se poloaiga a le faamasinoga, o le Tulafono 2008 e le talafeagai, ma ua oia ai le Faavae o Samoa 1960, ina ua pasia ma tuufaatasia ma le faamoemoe e oia ai vaega o le Faavae 2, 14, 15 102 ma le 109.

E 5 miliona le tagi a le SSIG faasaga i le malo, peitai ua faaalia e le sui sooupu a le SSIG, e faaono sili atu le aofai o le tupe o le tagi faasaga i le malo.