O le tau tulei, omia, le fia oo i le pito i luma le oso faalava ma le faia o togafiti e vave ai ona maua le avanoa muamua e tala ai lana faamanuiaga o le saofaga i le NPF, o vaega uma ia o le a fetuleni atu i le faagaioia o le talaina o meaalofa tupe o saofaga a le faitauafe o tagata faigaluega o loo iai a latou seleni i le NPF.
E valu pasene ua pasia e le Faalapotopotoga o le Faaputugatupe mo le Lumanai Manuia o Tagata le NPF o le a maua e tagata fai saofaga o se faamanuiaga maua ona o a latou saofaga. O le lima pasene o le aofaiga e valu pasene ua pasia e le Komiti faafoe e pulea lea faalapotopotoga a le Malo o le a tufatufa i tagata fai saofaga, ae o le 3 pasene e tuu sa‘o i le saofaga a le tagata e toatasi.
Faaalia e le pulega o le NPF e le o se taimi muamua lenei ua faia ai se tufatufaga poo se dividend mo tagata fai saofaga.
O le Aso Gafua o le vaiaso lenei 28 o Me 2012 o loo amata totogi atu ai le faamanuiaga e valu pasene ma o se fiafiaga lea i le au fai saofaga ona ua maua ai nai seleni faaopoopo i fuafuaga mo faatauga ma isi atinae o le aiga aemaise o nai seleni e tafafao ai i le Tutoatasi e lima aso o le a malolo ai mai galuega masani.
O le vaitaimi na aafia ai se vaega o le atunuu i le mala faalenatura o le tsunami, na pasia ai foi e le komiti faafoe o le NPF le totogi atu o se faamanuiaga mo tagata fai saofaga lea foi sa tumutumu ai le NPF.
O le itu mautinoa o le tagata lava e lapoa si seleni o loo iai i le saofaga e lapoa foi si ana faamanuiaga e maua, ona faasolosolo ifo lea i lalo i le vaega o tagata faigaluega e feololo ma laiti saofaga.
O le tufatufaga lea a le NPF ua toe tuu mai ai i le Aso Lulu 30 o Me e faagata ai le faatauina o pepa ulufale tai $30 tala mo le maimoaina o le koneseti a le faaili o le UB40.
Faaalia e se sui o le kamupani telefoni o le BlueSky o le mafuaaga lea o le toe tuu mai i le vaiaso nei o le tau maualalo o le pepa ulufale ina ia maua ai le avanoa o tagata o le a maua le faamanuiga i le NPF e faatau ai ni a latou pepa.
E tusa ma le $28 miliona se vaegatupe a le NPF o le a faaalu mo le totogiina atu o le faamanuiaga poo le dividend e lima pasene mo tagata fai saofaga uma i le NPF mo lenei tausaga.
