O le Aso Toonai 28 Aperila na amata ai le taamilosaga a le SRU o le Bluesky Super 9. O le taaloga amata na fai lea i Palauli i Savaii na feiloai ai le Warriors a Savaii i Sisifo ma le Eagles a Tuamasaga. Na toeitiiti lava maua le uluai manumalo a le Warriors ae o le sikoa mulimuli a le Eagles a ua uma le taimi na toe malo ai i ‘ai e 18-16.
O le taaloga lona lua na feiloa ai le Knights a Faleata i le ACP Marist Stadium ma le Vikings a Savaii i Sasa’e (Faasaleleaga, Itu o Tane ma Amoa).
Ae na matuā matautia faiga a le ‘au mai Salafai ina ua faatoilalo e le Vikings le ‘au a Faleata i ‘ai 43-26. Ua maua ai le malo o le Vikings i le vaiaso muamua o le Super 9.
O Samusu na fai ai le taaloga muamua a le Legends (Aleipata, Atua i Saute ma Anoamaa) ma le Navigators a Safata ma Lefaga. Ae o le Navigators ua folau ma le manumalo ina ua manumalo i ‘ai 34-29.
Ae o le malae i Apia Park na talimalo ai le Eels a Vaimauga i le Chiefs a Aana. O le taaloga autu foi lea o le 2017, na feiloai ai ‘au ia e lua e sue le siamupini o le Super 9 o le tausaga ua tea. O le taimi tonu lava amata ai le taaloga ae palasi loa ma uaga mamafa na lolovaia ai le taulaga i Apia ma Matautu faapea ai ma le malae i Apia Park.
Na aafia le taaloga i le mamafa o le malae ma le faaletonu o le faaaogāina o le polo. Ae o le poto foi ia o le Eels e taalo i le malae maseesee, e ui e lei faafiti foi le Chiefs latou, na taumafai e faatamoe le polo ae o ā ni taumafaiga a le ‘au mai Aana e faasaoasaoa le faatinoga o le taaloga na afaina i le maseesee e pei o se fasimoli o le polo lakapi. O iina na vaaia ai le paoa ma le malosi o le foueti a le Eels. E tolu sikoa na maua na a’a ai e Patrick Faapale le latou kapeteni.
O le faavae o le malosi o le Eels o lana sikalamu. Manaia tele le metotia o le sikalamu a Vaimauga na tulimanu iai lona taumafai. E lei umi ae vaaia taui o lea tomai i le sikoa muamua na maua lea e Fagu Malloy. E lei misi le a’a a Faapale. Na toe faaopoopo ma sala e tolu na maua mai lava i le malosi o le sikalamu. Na ova uma ia sala.
E lei umi ae toe faaopoopo le isi sikoa a le Eels e auala ia Ionatana Tino. Na’o le pau le tali a le Chiefs i le ‘afa muamua o le sikoa a le ‘afa o Pupi Ah See. Na ova le a’a ma maua ai ‘ai e 7 a le Chiefs ae 26 le Eels.
E lei lava lea i le faitau a le Eels, auā na toe faaopoopo le isi sikoa e auala ia Faapale ma faaopoopo ai lava e ia ‘ai mai le a’a. O ‘ai faaiu foi ia o le taaloga 33-10. O Faapale foi na ia maua le faailoga o le Tagata Taalo o le Taaloga i le Aso Toonai.
O le vaiaso lona lua o le a feiloai ai ‘au malolosi o le vaiaso muamua, e feiloai ai le Eels ma le Vikings i Apia Park. O le a malaga uma ai ‘au e lua a Salafai i Upolu auā e taalo le Warriors ma le Southern Tornadoes lea na bye i le vaiaso na tea nei. O le Navigators a Safata ma Lefaga o le a malolo lelei e leai ni la taaloga taaloga i le vaiaso fou.
Super 9 Vaiaso 1, Faaiuga o Taaloga
Premier
Vikings 43-26 Knights
Legends 29-31 Navigators
Eagles 18-16 Warriors
Eels 30-10 Chiefs
Under-20
Vikings 34-40 Knights
Legends 34-3 Navigators
Eagles 10-13 Warriors
Eels 24-10 Chiefs
Bye Southern Torandoes
O taaloga o le vaiaso fou
Eagles vs Knights, Apia Park (Taaloga autu)
Eels vs Vikings, Apia Park
Chiefs vs Legends, Fasitoo Tai
Southern Tornadoes vs Warriors, ACP Stadium
Malolo Bye, Navigators
