Ua fiu e tau saili se faa-Samoa o le igoa o le gasegase lenei poo se manaoga faapitoa foi lea ua maua ai le toatele foi o fanau o le atunuu ua maua ai le Down Syndrome. O se manaoga faapitoa ua iloa lelei ona e tutusa uma foliga o i latou e maua ai. E puiti mata, e pāpā le isu, e lapoa laitiiti lava le ulu mai i le toatele ma e telegese atu le pue i le tuputupu a‘e nai i lo isi tamaiti.
E ui o lea o fanau ua mafai ona maua le lagolago e aoaoina ai e vaaia lava le vave o le agai i luma ma o le lagolago lea ua vaavaai i ai le nofoaga ua nafa ma galuega faalauiloa ma fesoasoani i fanau e iai manaoga faapitoa, le SENESE ma isi nofoaga tutotonu faapea e pei o le Loto Taumafai ma le Ia Malamalama, ua tatau ona uma galuega faalauiloa ma polokalame ina ia saga aoaoina ai tagata Samoa e faatatau i lenei gasegase ma le lagolago poo le fesoasoani foi e tatau ona tuu atu i fanau ma tagata matutua ua maua ai. E mafua lenei gasegase ona o le faaopoopoga i le vaega o le fausaga o le tagata, e ta‘ua o le chromosome 21. E tatau ona taitasi sela o ia vaega o le tagata, peitai e iai taimi e faaopoopo ai ma fanau mai ai loa fanau e maua i le Down Syndrome.
O le toatele o fanau e aafia e mai tina ua sili atu i le 30-45 tausaga le matutua. Ae e lē na o tina e tauaveina le faaopoopoga lenei, e mafai foi ona maua mai e le tamaititi ia tulaga mai i lona tamā.
O le faatasiga na faatautaia mo le faatāua ua ave ia i latou ua maua i lenei manaoga faapitoa, na vaaia ai le faitau selau o fanau e Down Syndrome ma isi fanau e iai manaoga faapitoa i se polokalame o fiafia ma taaloga.
O le afioga i le Masiofo, le Afioga Filifilia Tupua Tamasese Efi na saunoa faapitoa i le faamanatu ai o lenei aso tāua ma le faatāua ua ave i tagata e iai manaoga faapitoa aemaise o le manaoga mo tagata uma o Samoa e malamalama i nei manaoga faapitoa ina ia saga unai ai le atina‘e o le soifua o fanau ua Down Syndrome. O le taimi muamua lenei ua faamanatu ai e Malo Aufaatasi i latou ua aafia i le Down Syndrome ma o le unai ina ia tausi nei fanau e tutusa lava ma le fanau e lē o iai ni manaoga faapitoa na saunoa i ai le tamaitai o Donna Lene, le faauluuluga o le SENESE.
Faaalia e lea tamaitai o le galulue faatasi o tagata uma i aoga, aiga ma nuu ina ia fesoasoani i fanau nei, e matutua fanau nei ua lava tapena foi i le tausiga o i latou lava i le agai ai i le avea ma tagata matutua. O le saolotoga lea e mananao uma i ai aiga, mo fanau nei, o lana saunoaga lea.
O lea ua iai nei le faamoemoe o le a faamanatu lenei aso tāua i Samoa i tausaga taitasi. O le taimi lenei e sili atu i le to‘a 150 i latou e maua i le Down Syndrome i Samoa.
