Tumau pea le logomalie o fatuga a le Punialavaa…Rev Lale & Vini Peteru

E ui i se fetuleni mai o le talutalufou o suiga o le olaga, ae lē mavae ma suia le logomālie o fatuga anamua.
O le po o le Aso Toonai na lolofi atu ai le mamalu o le atunuu se‘i toe faafofoga tasi i siufofoga faagalogata ma le faamalieloto o le susuga i le faafeagaiga ia Lale & Vini Peteru & nofoaalo faapea le aufaaili e pei ona malaga mai Niu Sila.

E ese foi i le maitau auā e toatele i latou o le uluai taimi lea ua silasila ai i le faaili a le Punialavaa, e ui ua aave ona tala ma lauiloa i le mālie o ana fatuga.

O le fetalaiga ia Leautuliilagi Malaeoalii Sogialofa Vaa Leapai sa fai ma fofoga o le po ma sa maualuga auā sa auai nisi o taitai o mafutaga e pei o le Leo o Tagata Samoa; sa auai foi le tamaitai pule o le Sinaworld Travel, Lemalu Patricia Steve Sevele, convenor a le leitio 4eb Tauiliili Ata & Elisapeta Malifa, Faatonu o le Miss Samoa ma le Komiti faapea tagata lautele na matuai matagofie ai le po atoa.

Sa faafiafiaina ai foi le ausiva a le Penina o Samoa Dance Group. Na liligo le fogatia a o saunoa manino le susuga i le faafeagaiga ia Rev Lale Peteru e momoli lona agaga faafetai e fai ma sui o le Punialavaa i le teu faatupu a le atunuu ma le maualuga o le agaga fesoasoani ua sao ai ma uli le faamoemoe.

O se aso faagalogata foi i le toatele auā o le uluai taimi lenei o nisi ua mafai ona feiloai atu ai i le faafeagaiga ma le faletua faapea le aufaaili a le Punialavaa. Sa faatumulia i le mamalu o Samoa, e le gata o Kuiniselani i soo se vaipanoa ma ona nuu tuaoi, ae o nisi o ē na malaga mamao mai i Sini ona o lenei faamoemoe.
Mo le silafia o le Susuga ia Rev Lale Peteru e mai le Afioaga o Vailele i le Vaimauga a o le Faletua ia Vini vaeane le Afioga ia Fuatino poo le Afioga ia Noamaleniu ia poo le Afioga foi ia Tafaifaalua e mai le Afioaga o Matautu ma Safaatoa i Lefaga, o Fasitoouta, Lotoso‘a Saleimoa ma Falelatai.

E pei lava foi ona silafia o le faletua ia Vini o se alo e faasino i se tasi o Tamalii lauiloa i Upufai o Malo, lea sa avea ma Fofoga Fetalai o le Maota fono o Samoa i aso ua alu, le afioga ia Nonumalo Sofara.
Na faamalieina le aufaaili a le Punialavaa auā na o latou tauaaoina se seleni e tusa ma le $11,097.90.
O le Aso Gafua na toe taliu ai le aufaaili i afioaga ma alalafaga ae o le Aso Lulu na tuua ai Brisbane e le faifeau ma le faletua. Sa faafofoga manino foi i se faafetai faapitoa i le po o le Aso Sa i luga o le letio ona ole aao mafola o le atunuu.