O le soifuaga atoa o le tina ia Papalii Lesina Silivaai Malietoa Laupepa Chungsum o le nuu o Fusi Safotulafai. O le tina na fanau i Leulumoega ona malaga lea o ona tuaa i Savaii i le aiga o lona tamā ia Kovio Leilua Siavii ma nonofo ai. O le nuu lea na faafaileleina ai lona olaga atoa, ae ina ua maliu lona tamā ona foi lea o lona tina i Sapapalii i le latou nuu ma ave ai i latou o lana fanau.
E lei tele sona taimi na iai i Sapapalii, ae malaga mai loa i Niu Sila nei i le 19 o ona tausaga. E moni lava e lei lava sona taimi na mafuta ai i Sapapalii ae lē mafai ona aveese i lona mafaufau le nuu o lona tina, auā e lagona lelei e le toto o le tagata ona auaiga, aemaise ai ua ia vaavaai o le nuu o lona tina na utu ai le toto masaa ina ua taunuu iai le talalelei a Iesu Keriso i le ekalesia EFKS lea ua faaigoaina o Mataniu Feagai ma le Ata.
O le aloaiaina ai o le faatuina o le lotu faamanatu a Sapapalii i Aukilani nei, na tapena ai lava le tina ma lona aiga e tali le faigamalaga e ala lea i le ta’iina o le sua a le susuga i le faafeagaiga aemaise ai o taulaga tupe sa latou foaiina ona o le manatu i le Atua ma lana galuega aemaise ai o le manatu i le latou tina sa tautua ai i totonu o le lotu i Sapapalii.
E lei muta ai iina le galuega alofa a le tina ma le fanau i le aso na aloaia ai le faatuina o le lotu faamanatu i Aukilani, ae na ia toe valaauliaina foi nisi o sui o le aumalaga mai i Samoa i le Aso Sa na sosoo ai e latou te faitoonai faatasi a’o lei toe tuuvaa atu i Samoa. Ma o lea sa latou toonai faatasi ai ma le susuga ia Papalii Taeu Masepau ma le faletua ia Galumalemana Sineva Papalii Ena, Moli Galumalemana Hosea, Etevise Aiono Papalii Taeu, ma le tamaitai ia Gloria Sila.
O se mafutaga fiafia ua maua e le tina ma le fanau faapea le aumalaga mai Samoa, ma ua faafesoaa’i ai foi manatu ma lagona lelei i lea mafutaga ina ia faamalosia ai i latou ma le fanau e tautua ma lagolago le lotu faamanatu a le ekalesia ma le nuu lea ua faatuina i Aukilani nei.
O le oso lelei foi lea i le faigamalaga ua lē gata i le faatuina o le lotu ae ua mafai ona galulue ma faamalosiau i loto o tagata Sapapalii o loo nonofo iinei e o e opogi le mafutaga a le nuu ma le lotu lea ua faatuina.
O le tagata ma lona faasinomaga o le tagata foi ma lona tupuaga, auā o le tina ma le fanau ua silia i le limasefulu tausaga o galulue ma tautua i totonu o le lotu Katoliko i Manurewa ae o le lagona o le tina, e lē o le ekalesia e tāua ae o le nofo fealofani ma le galulue faatasi e silasila mai iai le Atua.
O le lagona i le tina ia Papalii Lesina Silivaai o le a alu e tautua le mafutaga a le nuu a lona tina i Sapapalii i Aukilani i soo se mea e fai.
