Tumau fuafuaga mo le faletalimalo 400 potu i Savaii

Ua fa tausaga o le feagaiga, ma ua fuafua o le tausaga nei e fai ai le ground breaking”.. .Fofoga Fetalai

O Iulai o le tausaga e 2008 na sainia ai le maliega i le va o le nuu o Sasina ma le South Pacific Development Group mai Amerika mo le lisiina o le 600 eka o le fanua o le afioaga e fausia ai se faletalimalo e faitau miliona lona tau.

O se atina‘e tau tagata tafafao o le a fausia ai foi ma se nofoaga e taula i ai vaa poo se marina, faapea se falemai ma se malae tapolo.

Ua fa tausaga talu ai lea maliega ae ua faaalia e le faipule o Gagaifomauga Numera 3, le Susuga Laauli Leuatea Polataivao, o le tala lata mai o le tausaga nei e tatau ona amata ai galuega o lea atina‘e tele.

O le masina o Iulai o le tausaga nei o le a toe tauaao ai e le afioaga o Sasina tupe o le totogi o le lisi o le 600 eka o fanua faaleaganuu o le a fausia ai le atina‘e.

E lē o iai se masalosalo o le afioaga e pei ona saunoa le faipule o le itumalo i taumafaiga o le atina‘e e pei ona tuu atu i le Afioga Tupaisina Jesse James ma le South Pacific Development group.

“O loo matou fesootai pea i taimi uma, ma o Iulai o le tausaga nei e toe maua ai foi le tupe o le lisi”.

O le tuai tino mai o le atina‘e ona na saunoa Laauli o le faaletonu o tamaoaiga o le lalolagi i nai tausaga e lei mamao atu, na faamaamulu ai nisi o tagata milionea sa fia tuuina atu a latou tupe e faatino ai le galuega.

“Pei ona silafia e le atunuu o le taimi tonu lava o le a faatino ai le atina‘e lenei ae pau loa le tamaoaiga o le lalolagi atoa e aofia ai ma Amerika.

E lē i lalo ifo i le toafa pe toalima tagata milionea faapitoa sa aafia i le atina‘e na faamaamulu ona o le pau o le tamaoaiga o Amerika, ae e lē o faavaivai ai Tupaisina o loo taumafai pea ma saili tagata e mananao e invest a latou seleni i le atina‘e lenei.

O loo iai le talitonuga e tatau ona fai se ground breaking i le tausaga nei, ma o le fuafuaga lena lata mai o loo iai i le taimi nei.

O lana matafaioi o le alu e sue mai seleni e fau ai le faletalimalo ae o lea foi e lava papale le itumalo ma talitali pea seleni o le lisi”.

E 120 tausaga o le feagaiga o le lisi e faaaogā ai le 600 eka mo le atina‘e, ae o aiaiga e fai ma iloilo le maliega o le lisi. O le iloiloga muamua e faatino pe a mae‘a le 30 tausaga.

O le mae‘a ona sainia o le maliega i le tausaga e 2008 na faaalia ai e Tupaisina Jesse James, o le vaega muamua o le atina‘e e fausia ai se faletalimalo e 150 potu i le tau e 150 miliona tala Amerika.

O le atinae tau faletalimalo o loo fuafua o le a iai faafiafiaga ma taaloga e pei o se kasino.

Ua mae‘a ona pasia e le Palemene le tulafono e faataga ai ona faafoe fale kasino i le atunuu ma o loo aiaia ai ua na o ni faletalimalo filifilia e faia ai ia taaloga fai tupe.

O se tasi o faamanuiaga ua tuuina atu e le Malo mo lea atina‘e o le 15 tausaga e lē totogia ai ni lafoga i le faafoeina atoa o le atina‘e.

E lei faailoaina e le faipule o Gagaifomauga Numera Tolu le masina o le tausaga nei o loo fuafua e tata‘e ai le fagu uaina suamalie ma sua ai le eleele e aloaia ai le amatalia o galuega o lea atina‘e tele i Savaii.