O se taimi o le tausaga nei e tatau ona iloa ai se pisinisi poo se kamupani o le a filifilia na te faatautaia se tasi o atinae a le Malo, o le faletalimalo Five Star o le a suia i ai le maota o le Malo o loo i le eleele fou (silasila i le ata).
O se faatalanoaga ma le minisita o Tupe le afioga Faumuina Tiatia Liuga, na ia faailoa ai lea tulaga, lea foi na ia faaalia ai o se fonotaga faavaomalo i se taimi o le tausaga nei o le a auai, ma talatalanoa ai i sui o nisi o faletalimalo tetele i fafo, pe iai so latou lagona naunau e fia faagaioia lea atinae a le
Malo. E lē o iai se fuafuaga a le malo na te faagaioia le faletalimalo e pei ona faailoa e le minisita.
O se tasi lea o fuafuaga o le a mafai ona toso mai ai tagata tafafao i Asia pe afai o se pisinisi mai se atunuu Asia o le a ia faatautaia, ia poo se faipisinisi foi i Europa.
O le fuafuaga lenei o le a faasee uma ai ofisa o le Malo o loo i le maota o Mataafa Faumuina Mulinuu II i le eleele fou, i le maota fou fogafale 15 o loo tapena i ai le Malo e fausia i le nofoaga i Savalalo o loo iai le maketi tuai ua avea nei ma flea maketi.
O le ofisa o le Palemia ma ofisa o le toatele o minisita o le kapeneta faapea nisi o matagaluega a le Malo o le a siitia uma i lea maota fou, ae taatia le maota i le eleele fou e toe fausia atoa ina ia fetaui ma manaoga o atinae tau faletalimalo e pei ona faailoa e le minisita o tupe.
O le itu mautinoa tasi lea o vaaiga o le a fou ai vaaiga o le taulaga i Apia, pe a oo ina tulai mai lea faletalimalo, auā o se tasi lea o nofoaga tutotonu i le taulaga o le atunuu. O se nofoaga matagofie foi auā e tu lata i le sami ae faafeasagai ma le uafu i Matautu-tai, ae faataamilomilo ai le tele o isi vaaiga o loo i lea vaega o le taulaga.
I le fuafuaga o le fausia o le maota fogafale sefululima ua faaalia e le minisita le afioga Faumuina Tiatia Liuga, ua mae‘a ona feiloai atu i sui o le Malo o Saina mo se latou fuafuaga i le manao o le Malo o Samoa.
“O le taimi nei la o loo taatia atu ia Saina pe o le a se faiga e faatino ai le galuega lea, pe aumai se nonogatupe i ni tului mamā, pe faatupe e latou se vaega tele ae faatupe e tatou se isi vaega, ia pe fausia o se isi a latou foai mo Samoa”, na saunoa mai ai le minisita o tupe.
Ua iai nei se isi fuafuaga o le konekarate faufale mai Saina o loo fausia le maota gasegase fou i Motootua o le a nafa ma
le galuega o le maota e sefululima ona fogafale.
