E lei ta le 12 i le aoauli o le Aso Toonai ae ua tootutuli nisi o aulotu mai i Vaiusu, Apia faapea ai ma Falefa o le Ekalesia Katoliko i Samoa.
O loo faasasaga i le sami a o loo tootutuli atu i le matafaga o le afioaga o Lalomanu.
O le lauina o le Losalio lea o loo faalogoina e le anoano o loo feoai mai i taavale. O le nofoaga o loo faatautaia ai nei talosaga o loo manino ai lava le faaleagaina o Lalomanu e le galulolo o le masina ua tuanai.
O loo tele lava le otaota paepae solo, o loo tele foi faaputuga o otaota lapopoa i luga o le oneone i autafa o le auala, ae le o faaitiitia ai le tootutuli o sui nei o ia aulotu.
E silia i le itula talosaga nei ma le lauina o le Losalio, ae na taua e le tina ia “Kuinimeli” – lea o loo taitaia talosaga, o le faataua lava ua ave ia i latou e moomia nei talosaga.
“Ua matou faalogo i le tele o le mau tala faapea ua vaaia ma faalogoina agaga o tagata ua maliliu i eleele na faatamaia i le afa – ia e tele lava tala ae o le tulaga taua o le matou galuega o le tatalo mo agaga ua le maua se mapusaga ma tatalo mo aiga ma uo ua tuua ona o le oti,” o se saunoaga lea a le tina o Kuinimeli.
“O i matou e i totonu o le vaega a le Divine Mercy i Vaiusu, Apia ma Falefa, ma ua le oo mai uma o matou sui ae o nai tagata toaitiiti ua agai mai i afioaga ua aafia e ofo atu se fesoasoani e ala i talosaga, a ua leai ni fesoasoani tau tupe poo taumafa foi, ae o lenei galuega o le tatalo ma lau le Losalio aua le fesoasoani mai a le Tina Paia, ia atonu ua mafai ai ona fai atu so matou foi sao i le taua o le faamalosi atu i nai aiga ua fememeai ma ua le maua se to‘a ona o lenei faalavelave tele ua atoa le masina talu ona tulai mai”.
E faagasolo i afioaga talosaga, ma e talitonu lava i latou nei i le mana faaola ma le mana faamamafanafana o tatalo ma o se galuega lenei ua iloa ai foi lenei ituaiga o le Ekalesia Katoliko i Samoa ma isi itu o le lalolagi.
E le gata i le Divine Mercy ae na auai atu foi Aulotu o le Ogatotonu o Tapuaiga, le Worship Center aua le ofo atu o a latou foi faamalologa ma talosaga aua lava aiga ua mafatia pea i le malaga a le maliu ma le oti ua aafia ai le toatele o aiga ma fanau.
Na vaevae pasi tutumu e lua a le Worship Center i lenei taumafaiga ma na taua e le alii faifeau o Pastor Faapopo Semau, e eseese lava talitonuga ma ua maea ona vaaia le galuega faaletalalelei o loo faasoa atu pea e isi aulotu i le mamalu o i latou i nei afioaga, peitai o le faaopoopo ua o latou avatu ina ia mafai ai ona iai se isi auala e fesoasoani ai i finagalo o i latou ua mafatia.
O nei asiasiga na molimauina ai le tele o le manaoga mai i nuu ma aiga nei ina ia faaauau loa lenei fesoasoani i vaiaso taitasi ma ua toe fuafua foi lenei vaiaso e ia aulotu eseese mo nisi asiasiga i nofoaga ua faamautu ai aiga o afioaga ua afaina uma ona o le galulolo.