O le a faatauina i tua le ata tifaga o le TUIGA i maketi i Niu Sila, i le Aso Tofi o le vaiaso nei lava, aso 1 Setema 2011
E lei tele se vaega o le ata tifaga fou ua faaigoaina i le Tuiga, na maimoaina i le po na uluai faaalia ma tatala ai mo le taimi muamua.
E ui ina sa toatele sa tulituliloa se vaaiga ma le silasila i le faaaliga o le ata atoa, peitai sa lē tusa ai ma aiaiga ma tuutuuga, mai le fono faatonu e pasia ata tifaga i Samoa.
O le saunoaga a le susuga i le Faatonusili o le kamupani pueata, le South Seas Pictures Ltd, sa nafa ma le tuufaatasia o le ata tifaga, le tofa Tanupo Aukuso, sa ia faamanino ai le tulaga o le lē mafai ona silasila atoa i le ata. Peitai o se vaega sa maimoaina i lea po, ua lava lea e fai ma molimau i le toatele, o se galuega ma se ata matagofie, ma o le a faatalia ma le onosai le taimi ma le aso o le a faatauina ai mo maimoaga a tagata lautele.
Na faatumulia Malaeola i le po o le Aso Faraile talu ai, i le mamalu o le atunuu ma i latou sa tulituliloaina le faalauiloaina o le ata tifaga o le Tuiga mo lona taimi muamua. E le gata i le maimoaina o le ata, a o le auai foi o le alii pese tautaua i lenei vaitaimi, le susuga ia Richard Parker, ma le tamaitai pese lauiloa, le teine o Cindy of Samoa.
O le Tuiga e pei ona saunoa i ai le tofa ia Tanupo, na afua mai i se talatuu faa-Samoa, ma sa amata pueina ai i afioaga sa faapogai ai lea foi tala ma tofiga.
E tele se tamaoaiga ma le ‘oa i aganuu o loo fai ma feau autū o le ata tifaga, peitai o le manaia ma le susua o le maimoa o le faatau ma silasila i ai i le ata ma lona talaaga faapea ma lona faatinoina.
O afioaga o Saanapu, Lefaga, Sataoa, Lotofaga i Safata, o Vailele, Faleula ma Apia, o nuu ia o le motu i Upolu; a o Savaii, o Asau, Vaisala ma Manase o afioaga uma ia sa pueina ai vaaiga eseese o le ata tifaga o le Tuiga.
Sa faamaonia mai e le tofa Tanupo Aukuso, o le Aso Tofi nei i Niu Sila, aso muamua o Setema, o le a mafai ai ona avanoa le ata mo faatauga a le atunuu ma tagata lautele. O lea fuafuaga sa faamaonia mai, ina ua mae’a ona aumai se faatagaina faapitoa mai Samoa e le komiti sa iloiloina ma pasia le ata tifaga e tusa ai ma faiga faavae.
Na ta’ua foi Tanupo, o le po foi o le Aso Tofi o le vaiaso nei lava i Samoa, ua fuafua e faalauiloa ai e pei ona faia i Aukilani nei, le Tuiga ma faatauina ai foi mo Samoa lava latou ia. Ua faamoemoe foi le alii Faatonusili o le kamupani e toe taliu atu i Samoa, a o lei faataunuuina le faamoemoe e pei ona ta’ua.
O le ata lona lua lenei talu foi ona tulai mai le kamupani a le South Seas Pictures mo ana taumafaiga i le tuufaatasia o ata tifaga e pueina lava i Samoa, ma faatinoina foi e tagata Samoa.
O le isi foi lea autū o taumafaiga a lea kamupani e pei ona ta’ua e Tanupo, o mea uma i taga ma le faatinoina o le a faia lava e Samoa, ma onaina e Samoa.
O le ata muamua sa pueina ma faatauina e lua ona vaega, o le ata sa faaigoaina o le Tautoga Gausia.
O le Tuiga, ua lua i ai ata tifaga o le a molimauina mai taumafaiga lava a lea foi tamalii o le atunuu ma lana pisinisi.
O le tofa ia Tanupo ma Taufau Aukuso o faatonu ia o le kamupani South Seas Pictures Ltd, ma le Samoa Video Centre i Otahuhu Niu Sila ma Samoa.
O le pese autū o le ata tifaga (theme song), o loo usuina e le afioga ia Aumua Toafa Ai’i ma le tamaitai pule o le kamupani pue ata, le faletua ia Taufau Aukuso. O malo faaaloalogia sa auai i lea po, e aofia ai le afioga i le Konesula o Samoa, le susuga ia Faolotoi Reupena Pogi, faapea le afioga i le Hai-Komesina, le susuga ia Tuiataga Asi Blakelock ma lona faletua, Telesa Helen Blakelock.
O lea foi po sa maimoa ma silasila ai le mamalu o le atunuu, i le saunoaga a le alii Palemia o le atunuu, le susuga ia Tuilaepa Lupesoliai Aiono Sailele Malielegaoi.
O lea saunoaga sa faapitoa lava i taumafaiga a le kamupani a le South Seas Pictures Ltd ma lona tulai mai.
O fofoga o lea po o le fetalaiga ia Leofo Isaia o se failauga o tala ma upu, ae aga mālie tele foi, faatasi ai ma le sui o le Radio Samoa, le susuga poo le tofa ia Seumanu Francis Ioane.
Na molimauina le matagofie o lea po se’i vaganā ai le taimi o le u, na matuā vevesi ai le atunuu, ma faalavelave ona o le laualo ma le popole i taumafa, a o faagasolo vaega tāua o le polokalame e pei ona faatulagaina.
