Na logoina leoleo e se tagata na telefoni i le ofisa autu i Apia ma ta‘u iai se ta’avale o loo fealua’i ma maruana.
O le numela o le laisene poo le number plate, le lanu ma le ituaiga o taavale o faamatalaga ia na mulimuli ta’i ai le suesuega a leoleo i le aso 5 o Tesema o le tausaga e 2007. Na mulimuli ai leoleo i magaala na ui le pikiapu seia oo ina taunuu i se fale i le pitonuu o Levili i Apia lea na faatino ai loa suesuega.
O le alii o George Fe’esago o ia lea na aveina le pikiapu na tuliloa e leoleo.
Ina ua sueina le taavale na maua ai e leoleo se taga pepa iila lapoa o loo iai lala maruana, ae o ni fatu maruana ma lau sa maua i le taga o le ofuvae o George.
O taga pepa iila e tolu o maruana na maua i le taavale na saati e leoleo ma fafao i se taga aluga lea na teuina i le vaega e teu malu ai vaega faapea ma faatino loa suesuega e pei ona sa fesiligia ai lē ua molia.
Sa matua teena e George Feesago moliaga o lona umia o laau faasaina ma o le alii loia o Toleafoa Solomona Toailoa sa tulai mo ia ina ua suesueina molimau a leoleo.
I le tolaulauga a le itu tetee na fesiligia ai e Toleafoa Solomona le itu o le faigata ona mautinoa lelei o mau a leoleo i le lapoa o le taga pepa na maua i le taavale lea na iai ma maruana i totonu.
Sa finau le alii loia e eseese lapopoa o taga pepa iila pe a fua i le molimau a lē o loo molia.
Peitai e ui ina sa malosi le finauina e le itu tetee o lea tulaga ae na faaalia e le afioga Lesatele Rapi Vaai sa faatautaia le faamasinoga, e manino mai i molimau a leoleo, sa mautinoa lava e George o maruana na ia umia.
O lona uiga ua faamaonia le moliaga e aunoa ma ni masalosaloga tatau.
O le masina o Me na aumai ai le taunuuga o suesuega i molimau ae o le masina nei o Iuni na faatoa lauina ai le faaiuga lea ua salatupe ai i le $3,000 tala lē ua molia.
O le aiaiga o lona faasalaga e tasi le afe tala e totogi i le ofisa o leoleo ma le $2,000 o le totogi o le faatinoga o le faamasinoga atoa e aofia ai ma suesuega a leoleo. O le faatoa molia lea o George Feesago i se solitulafono.
O le isi taulealea sa molia ai foi i le gaioiga na molia ai George o loo tuli lona faasalaga e iva masina i le falepuipui, ina ua ia ioeina le moliaga.
O lea taulealea ma lē ua faasalaina i se salatupe, sa maua uma atu e leoleo i se fale i Levili i le aso na faia ai le suesuega lea na maua ai maruana i le taavale ma le taga o le ofuvae o George Feesago.
