Tulai se tufuga talavou e tauave Measina

E luasefulu tausaga o se alii Tufuga Malofie ua iloga lana tautua i Ausetalia sa faamaeaina i le Aso Toonai talu ai lana galuega lagi malofie i Cabramatta.

O le susuga ia Ioane Faamausili 20 tausaga mai Perth na malaga faapitoa mai i Sini auā se faamoemoe o le afioaga o Gataivai ma faatino ai ona tiute faa matuaofaiva.

E mae‘a le galuega ua laei le susuga a Michael Tumua Tuaoi ma Faleao Faamavaega i le togiga o le malofie. O le itu mataina i le faatinoina o le lagi Malofie e le susuga ia Ioane Faamausili e pei o se tagata ua loa i le matafaioi talu ai faatoa ato lona luasefulu tausaga.

Na faailoa e Faamausili o le ono tausaga talu ai faatoa sefulufa ona tausaga na ui ai le ula a si ona tamā ia Peni Faamausili o se tufuga matapalapala ia te ia i le faiva lenei. Na amata mai i lea taimi na malaga solo Ioane i mau galuega i Niu Sila, Samoa, Sini ma Perth i Ausetalia nei.

O le tausaga 2005 na uluai auai atu ai i se faaaliga ta Tatau na faia i Aukilani i le malae o le Western Springs lea na tatala ai lana silasila ma le naunau e fia tauaveina lenei taleni auā measina a le atunuu.

O le vaitau foi lea na amata ai loa ona ia atili tapueina le amataga mai o le faagasologa o le malofie mai le Va‘a, pulatama sosoo ai ma aso faaifo.

Sa mataitu lelei isi mamanu e pei o le saemutu o fusi o vae, atigivae, tapulu ma le faamulialiao, selu, faalaufao, sigago, ulumanu seia oo lava i le mea ma sama loa pe‘a ma malu. O le ono tausaga talu ai ua mafua ai le vave o le faamausaliina o lona agavaa.

A o tapuai la le mamalu o le Aiga alii o Tavu‘i Toatasi Asiata i Cabramatta ma alii solo ma le Toso ia Faleao Filiki ma Faleao Ieremia na iloga le mataalia o le susuga ia Ioane Faamausili lea e aualofa ai foi i lona Tuaa ia Peni Faamausili ua 73 tausaga mai Falealupo ma si ona ia Taulau o Gataivai.