Tulai mai pea sauaga i tina ma fanau i totonu o aiga

O se tasi lenei o solitulafono ua faaopoopo pea le tulai mai i totonu o aiga – o sauaga faasaga i tamaitai (tina) faapea ai fanau.
O le masina o Setema i le tausaga na tea nei – na taofia ai se tamaitai i le Potu numera fitu (7) o le Falemai tele o Tupua Tamasese Meaole i Motootua.
Na logo atu le ofisa o Leoleo ma o le tamaitai leoleo o le vaega fou o le Matagaluega ua nafa ma sauaga i totonu o aiga, lea na tali i lea lipoti mai le falemai.
Faaalia e Satini Vaalele i luma o le faamasinoga i le iloiloga o le mataupu lenei, na muamua talanoa i le tamā o le aiga, lē ua molia ma faamaonia nei lona fasi o lona toalua ma oti ai.
O lona suafa o Falanisisi Talataina o Vaitele-Uta ona ua taua e lipoti mai i le falemai manua o le ulu ma foliga o le tina.
Na maea lea talanoaga ona asiasi loa lea o lea tamaitai i le falemai ma na ia faaalia le matautia o vaaiga i le fulafula ma le solouli o foliga o le tina ia Liu Fiaui, ma na le mafai ona tautala ane ia te ia.
O le uso o lea tina na talanoa ane ma ta’u ia Satini Vaalele, o lona uso ua fasi e lona toalua. O se tasi lea o molimau na fofogaina i se vasega o Faatonu e to’afa na o latou faatautaia le fofogaina o le iloiloga o le moliaga o le fasioti tagata pa’ivalea na faia faasaga i le alii o Falanisisi Talataina.
Na matua teena e lenei alii lea moliaga ma mafua ai loa le iloiloga e pei ona sa faatautaia i le vaiaso na te’a nei. Sa iai se finauga i le mafuaaga tonu lava o le maliu, talu ai e lua lipoti a fomai na toe tapa i luma o le faamasinoga.
O le molimau muamua o se lipoti a se fomai na siakiina le tamaitai lenei ina ua maliu, lea na faapea mai o le laoa o le tamaitai ua maliu i se fasi fa’i na punitia ai lona ala ea na mafua ai le mole ma maliu ai loa.
Peitai na toe suesue e le fomai na faatinoa le taotoga o le tino maliu o lenei tamaitai pe o iai ni faailo na maliu lenei tamaitai ina ua mole ma ta’ua ai loa i luma o le faamasinoga o le suesuega i le lanu o lima o le ua maliu, o lona mama ma lona ua na maua ai e le o le mole poo le laoa foi na mafua ai le maliu o lenei tamaitai, ae o se isi i lona atigipoo (sei tulou) ua maua ua sao i ai le toto ma afaina ai le faiai o lenei tina.
O le mafuaaga lea o le maliu e pei ona ta’ua e le fomai na faia lona taotoga. O le faaiuga a faatonu na o latou lagolagoina ai le molimau mulimuli, a le fomai na faia le taotoga o le tina ia Liu.
Faaalia e le faaiuga a faatonu, ua manino o manaoga e tolu e pei ona faamanatu i ai e le afioga i le Faamasino o le Faamasinoga Maualuga, le Afioga Lesatele Rapi, ua agai ai i le faamaoniga na faaoolima lenei alii ma le mafaufau e faaoo manu’a i lona toalua e ui sa lei iai se manatu e faaoo le oti i le tina.
O le tulaga faanoanoa o lenei mataupu ona o le foliga faigofie o le mafuaaga na faaoolima ai lenei tama i le tina o le aiga. Faaalia e lipoti a leoleo o lenei solitulafono na amata mai i suaga a le tina e faatatau i le mata o le suavai na saunia e le ua molia.
O le ita tele la o le alii i le ula atu o lona toalua i le mata o meaai na tao i le umu na faasaga ane loa faaoolima i lona toalua e ala i le tatu‘i ma le feaa o le tina.
O se faaoogalima na faatoa tuu lava ina ua vaai atu le alii ua matua tigaina lava le tina. O le taofiga lava la o le tina lea na iu ai lava ina maliu. O le masina o Fepuari lea ua tuu atu i ai le faasalaga o lenei alii.